Курскда Украина қўшинлари қуршаб олингани йўқ – Зеленский

Россия Федерациясининг Курск вилоятида Украина кучларининг операцияси давом этмоқда. Бу ҳақда Украина Президенти Владимир Зеленский кеча, 15 март куни Telegram-каналида айтиб ўтди.

Украина Президенти Украина Қуролли кучлари Олий Бош Қўмондони Александр Сирскийнинг ҳисоботини тинглади ва Курск вилоятида Украина қўшинлари қуршаб олингани йўқлигини яна бир бор маълум қилди.

“Курск вилоятининг айрим ҳудудларида қўшинларимиз операцияси давом этмоқда. Бўлимлар вазифаларни керакли даражада бажаради. Курск вилоятидаги Украина кучлари туфайли Россия қўшинларининг катта қисми бошқа йўналишлардан тортиб олинди. Бизнинг қўшинларимиз Курск вилоятида Россия ва Шимолий Кореянинг тегишли гуруҳларини ушлаб туришда давом этмоқда. Бизнинг қўшинларимиз қуршаб олинмаган”, деди Зеленский.

Украина Президенти Россия қўшинларининг шарқий чегарада тўпланганига ҳам эътибор қаратди.

“Шунингдек, биз Украина билан шарқий чегарамиз бўйлаб йўналишларни кўрмоқдамиз, у ерда Россия армияси кучларни тўплайди. Бу Суми вилоятига зарба бериш истагидан далолат беради. Биз буни тушунамиз ва бунга қарши турамиз. Мен барча ҳамкорлар Путин (Россия Президенти Владимир) айнан нимани режалаштираётганини, нимага тайёрланаётганини ва нимани эътиборсиз қолдиришини тушунишларини истардим”, деб таъкидлади у.

Украина Президентининг сўзларига кўра, “Россия қўшинларининг тўпланиши Москва дипломатияга эътиборсизлик қилишда давом этиш ниятида эканлигини кўрсатади”.

”Россиянинг урушни узайтириши аниқ. Биз ҳамкорларимизга фронтдаги, Курск вилоятидаги ва чегарадаги вазият тўғрисида барча реал маълумотларни тақдим этишга тайёрмиз”, деб қўшимча қилди у.

Украина Президенти, шунингдек, 1000 км масофада “Узоқ Нептун” ракетасидан муваффақиятли жанговар фойдаланилгани ҳақида ҳам маълум қилди.

“Бугун бизнинг ракета дастуримиз ҳақида ҳам хабарлар бўлди. Муҳим натижалар мавжуд. "Узоқ Нептун" синовдан ўтказилди ва жангларда муваффақиятли қўлланилди. Янги Украина ракетаси, аниқ зарба. Масофа минг километр”, деди у.

Қайд этиш жоиз, АҚШ Президенти Дональд Трамп ҳам 14 март куни Курск вилоятидаги вазиятни шарҳлаб, Truth Social'да пост қолдирганди.

“Айни дамда минглаб украиналик аскарлар Россия армияси томонидан тўлиқ қуршаб олинган ва улар жуда ёмон ва ҳимоясиз аҳволда. Мен Президент Путиндан уларнинг ҳаётини сақлаб қолишни қаттиқ илтимос қилдим. Бу Иккинчи жаҳон урушидан бери кузатилмаган даҳшатли қирғин бўларди. Барчасини худо қўлласин”, деб ёзди у. 

Бунга жавобан Владимир Путин Курск вилоятида қуролини ташлаб, таслим бўлган украиналик аскарларга ҳаёт ва ҳарбий асир сифатида муомала қилиш кафолатланишига ваъда берди. Бунгача эса Путин Курск вилоятига ташрифи чоғида у ерда қўлга олинган украиналик ҳарбийларга террорчи сифатида муносабатда бўлишини таъкидлаган эди.

Владимир Зеленский эса 14 март куни Киевда журналистларга Украина Қуролли кучларининг Курск вилоятидаги операцияси “ўз вазифасини бажарган”ини айтди.