Куба АҚШ билан келишуви доирасида 553 маҳбусни озод қилади

Куба ҳукумати 553 маҳбусни қамоқдан озод қилганини эълон қилди. Бу ҳақда кеча, 14 январь куни Оқ уй хабар берди.

АҚШ Президенти Жо Байден Кубани терроризмга ҳомийлик қилувчи давлатлар рўйхатидан чиқариш ҳақидаги ҳужжатни имзолаган. Байден томонидан имзоланган баёнотда, жумладан, Куба ҳукумати “охирги олти ой ичида халқаро терроризмни қўллаб-қувватламагани” ва Вашингтонга “келажакда халқаро терроризмни қўллаб-қувватламаслигига кафолат бергани” қайд этилган. Ватикан ҳам Куба ҳукуматининг 553 маҳбусни озод қилиш қарорига ҳисса қўшган.

Куба Коммунистик ҳукумати Байденнинг қарорини “тўғри йўналишдаги қадам” сифатида олқишлади, бироқ, AFP News'нинг ёзишича, мамлакат 1962 йилдан бери амалда бўлган АҚШ санкциялари остида қолаётганидан афсусда. Агентлик таъкидлаганидек, Куба озиқ-овқат, дори-дармон, электр энергияси ва ёқилғи тақчиллиги билан ифодаланган сўнгги ўн йилликлардаги энг ёмон иқтисодий инқирозда Қўшма Штатларни айбламоқда.

Мамлакат Президенти Мигель Диас-Канель АҚШ санкцияларини “геноцид” деб атади ва унинг мамлакати АҚШнинг сайланган президенти Дональд Трампнинг бўлажак инаугурациясидан сўнг “қийинроқ вазиятларга” тайёр эканини айтди, унинг маъмурияти 2021 йилда Кубани терроризмга ҳомийлик қиладиган давлатлар рўйхатига киритганди.

2021 йилнинг июль ойида минглаб кубаликлар электр таъминотидаги узилишлар ва озиқ-овқат нархларининг кўтарилиши туфайли норозилик намойиши ўтказди, бу “сўнгги йилларда ҳукумат учун энг катта муаммо” бўлганди.

“Justicia 11J” инсон ҳуқуқлари ташкилотига кўра, бу намойишлардан кейин 1500 дан ортиқ одам ҳибсга олинган, улардан 600 нафари 2024 йилнинг декабрига қадар қамоқда эди.

Эслатиб ўтамиз, аввалроқ АҚШ ҳукумати Гуантанамодаги АҚШ ҳарбий-денгиз кучлари базасида сақланаётган 11 маҳбусни кўчиргани ҳақида хабар берилганди. АҚШнинг миллий хавфсизлик манфаатларини кўзлаб, улар қўшни Яманга, Уммонга олиб кетилган.