Коррупцияга қарши курашда, ҳатто қариндошимни ҳам аямайман – Жапаров

Бугун, 11 март куни Қирғизистон Президенти Садир Жапаров Жогорку Кенеш мажлисида мамлакат ҳукуматининг коррупцияга қарши кескин чоралар кўришини маълум қилди. Бу ҳақда “АKI press” хабар берди.

Қайд этилишича, Президент ҳар қандай шахс, ҳатто юқори лавозимдагилар бўлса ҳам чора қўлланилишини таъкидлаган.

“Коррупцияга ўрин йўқ. Биз энг бошиданоқ коррупцияга ва уюшган жиноятчиликка қаршимиз. Сизлар буни яхши биласизлар. Ҳеч кимни аямаймиз”, дейди давлат раҳбари.

Президент, шунингдек, антикоррупция сиёсати ҳамма учун бир хил эканини, қариндошларини ҳам кечирмаслигини айтган.

“Ҳатто, яқин қариндошларимни ҳам кечирмайман. Шу билан бирга, менинг қариндошларим ва фарзандларим давлат хизматида ишламайди, давлат органларида фаолият юритмайди. Шу сабабли хотиржамман”, деган Жапаров.

Жапаров мажлисда коррупционерларни танқид қилиб, улар қотил жиноятчидан ҳам хавфли эканини айтган.

“Агар жиноятчи бир кишини ўлдирса, коррупционер бутун давлатни бузади. Шу сабабли сизлардан коррупцияга қарши курашишда ёрдам беришингизни сўрайман. Агар ҳукумат вакиллари томонидан ўғрилик ёки коррупция содир этилса, мажлисда айтинг. Бу сизнинг менга қилаётган ёрдамингиздир. Ҳеч кимдан қўрқманг. Мен сизларни ҳимоя қиламан ва ёнингизда бўламан”, деб мурожаат қилган Жапаров депутатларга.

Эслатиб ўтамиз, аввалроқ Қирғизистонда янги тайинланган Фавқулодда вазиятлар вазирлиги раҳбари Урматбек Шамирканов эгаллаб турган лавозимидан озод қилинганди.

Президент матбуот котиби янги вазир нима учун тайинланганига ҳали бир ой ҳам бўлмай туриб ишдан олинганига изоҳ берар экан, бунга унинг аввалроқ вазир ўринбосари лавозимида ишлаб юрган кезларида пора олганликда гумон қилинаётгани сабаб бўлганини айтган.

Шундан сўнг Жапаров бугун, 11 март куни Фавқулодда вазиятлар вазирлиги раҳбари лавозимига Қанотбек Чиннибоевни тайинлади.