Коронавирус ҳақида ваҳимали хабар тарқатган ички ишлар ходими бўшатилди

Наманган вилоятида ички ишлар органларида хизмат қилувчи ходим мессенжер орқали асоссиз, аҳоли ўртасида ваҳима келтириб чиқарадиган хабар жўнатгани учун вазифасидан озод қилинди. Бу ҳақда Наманган вилояти ИИБ маълум қилди.

Жорий йилнинг 12 апрель куни ИИО ходимининг кўпчиликда салбий фикр ва эътирозлар уйғотган  видеотасвири ижтимоий тармоқларда тарқалди. Наманган вилояти ИИБ ЎХБ томонидан мазкур ҳолатни ўрганиш мобайнида 11 апрель куни Наманган шаҳар Халқ банкида ишловчи фуқаро коронавирус пандемияси бўйича топширган таҳлил натижаларига кўра унда мазкур вирус аломатлари бор дея гумон қилинган эди, банк ходими 1 апрелдан 11 апрелга қадар Наманган шаҳрининг 6 та маҳалласида истиқомат қилувчи нафақа олувчиларга пул тарқатганлиги боис, ушбу ҳудудларда инфекция тарқалишини олдини олиш мақсадида шаҳар ИИО ФМБ ходимларидан иборат 6 та гуруҳ тузилиб, нафақа олган фуқароларни хонадонларини карантин назоратига олиш, уларга тушунтириш ишлари олиб бориш бўйича амалий иш ташкил этилган.

Бироқ ушбу тадбирга жалб этилган Наманган шаҳар бўйича ИИО ФМБ 4-сон ИИБ ходими ўзи бириктирилган штабда тиббий кийим ва тиббий ниқобда турган ҳолатида ўзини гуруҳ аъзолари билан бирга видеотасвирга олиб, тасвир давомида Наманган вилояти ҳудудида карантин ҳолати эълон қилинганлигини била туриб, аҳоли орасида ваҳима чиқарувчи ҳамда банк ходимига нисбатан обрўсизлантирувчи ва асоссиз маълумотларни сўзлаб, жами 39 сонияли видеотасвирни Telegram мессенжери орқали танишига юборган. 

Аниқланган ҳолат юзасидан вилоят ИИБ ЎҲБ томонидан ўтказилган хизмат текшируви ҳулосасига кўра, ушбу ходим “Ички ишлар органларида хизмат ўташ тартиби тўғрисида”ги низом талабларининг 144-банди “и”, “к” кичик бандларига мувофиқ хизмат интизомини қўпол равишда бузганлиги ҳамда ички ишлар органи ходимининг шаънига путур етказувчи хатти-ҳаракатлар содир этганлиги учун ИИО хизматидан бўшатилди.