Кореяда мижозларга 44 млрд долларлик биткоин адашиб ўтказиб юборилди

Жанубий Кореянинг энг йирик криптовалюта биржаларидан бири Bithumb мижозларга хатолик сабаб 44 млрд долларлик биткоин ўтказиб юборди. Бу ҳақда “Reuters” хабар берди.

Маълум бўлишича, бугун 7 февраль куни Жанубий Кореянинг Bithumb криптовалюта биржаси мижозларга тахминан 44 миллиард долларлик биткоин ўтказиб юборган. Сеулда жойлашган компания воқеани хакерлик ҳужуми ёки хавфсизлик билан боғлиқ муаммо эмаслигини аниқлаган.

Биржа маълумотларига кўра, 695 нафар мижоз 2000 вон (тахминан 1,37 доллар) миқдорида бонус олиши керак бўлган. Тасодифий хатолик сабаб вон ўрнига мижозларнинг ҳар бирига 2000 биткоин ўтказиб юборилган. Жудаям кўп одамлар дарҳол ўз криптовалюталарини сотишни бошлаган. Бу эса бозорга кескин таъсир қилиб, биткоин нархи қисқа вақт ичида 17 фоизгача пасайиб кетган.

Bithumb воқеа учун узр сўраган ва хато тарқатилган 620 000 биткоиннинг 99,7 фоизини қайтариб олганини билдирган.

Эслатиб ўтамиз, аввалроқ биткоин нархи 2024 йилнинг 6 ноябридан буён илк бор 72,9 минг долларгача пасайгани ҳақида хабар берилганди.

Жавоҳир Алиқулов