Концертида Фаластин байроғини кўтарган мусиқий гуруҳ тақиққа учради

Британиянинг Massive Attack мусиқий гуруҳи Сингапурдаги концерти вақтида саҳнада Фаластин байроғини намойиш қилгани учун мамлакатда қайта концерт ўтказиш ҳуқуқидан маҳрум қилинди. Бу ҳақда мамлакат полициясига таяниб, “The Guardian” хабар берди.

Полиция маълумотига кўра, жорий йилнинг 29 июль куни бўлиб ўтган концерт вақтида гуруҳнинг икки аъзоси саҳнада Фаластин байроғини кўтарган. Улардан бири, шунингдек, “Free Palestine” (“Фаластинга озодлик”) деб қичқирган.

Қайд этилишича, Сингапурда махсус рухсатномасиз хорижий давлатларнинг байроқлари, давлат рамзлари ёки баннерларини очиқ намойиш қилиш қонун билан тақиқланган.

Тергов якунларига кўра, икки мусиқачига расмий огоҳлантириш берилган ва уларнинг Сингапурга қайта кириши тақиқланган. Шунингдек, мамлакатнинг медиа регулятори гуруҳнинг келгусида концерт ўтказиш учун бериладиган ҳар қандай аризасини рад этишини маълум қилган.

Ҳуқуқ-тартибот идоралари концерт ташкилотчиси лицензия шартларидан хабардор бўлганига қарамай, концерт давомида мазкур қоида бузилганини таъкидлаган. Шу билан бирга, регулятор лицензия талаблари бузилган-бузилмаганини ҳам ўрганмоқда. Ҳозирча концерт ташкилотчиси ушбу ҳолат юзасидан изоҳ бермаган. Massive Attack ҳам расмий баёнот билан чиқмаган.

Полиция Сингапурда яшовчилар ва хорижликларни мамлакатга ташқи сиёсий можароларни олиб кирмасликка чақириб, бу ижтимоий ҳамжиҳатлик ва қонун устуворлигига путур етказиши мумкинлигини таъкидлаган.

Маълумот ўрнида, Massive Attack гуруҳи Исроилнинг Ғазодаги ҳарбий амалиётларини танқид қилиши ва Фаластинни қўллаб-қувватлаши билан танилган. Гуруҳ етакчиси Роберт Дел Нажа жорий йил апрель ойида Лондонда Фаластинни қўллаб-қувватловчи акцияда иштирок этгани учун қўлга олинган 200 дан ортиқ намойишчилар орасида бўлган эди.

Эслатиб ўтамиз, аввалроқ Испания Бош вазири Педро Санчес “Барселона” ҳужумчиси Ламин Ямалнинг Фаластин байроғини кўтариб чиққанини қўллаб-қувватлаган эди.