Контент учун мушук боласини улоқтирганлар жазоланди (видео)

Кўпроқ кузатувчи йиғиш учун мушук боласини баланд тўсиқ орқали отган йигит жазоланди. Уларнинг қилган иши ижтимоий тармоқларда катта эътирозларга сабаб бўлди. Бу ҳақда Андижон вилояти Ички ишлар бошқармаси хабар берди.

Аниқланишича, воқеа жорий йилнинг 27 июль куни Андижон шаҳридаги “Navruz Mall” савдо-кўнгилочар мажмуаси олдида содир бўлган. Шаҳрихон туманида яшовчи, 2008 йилда туғилган фуқаро кўпроқ кузатувчи йиғиш мақсадида мушук боласини қурилиш майдончасига улоқтирган.

Ушбу ҳодиса унинг 2006 йилда туғилган таниши томонидан видеога олинган. Кейинчалик видео 18 ёшли йигитнинг Instagram саҳифасига жойлаштирилган.

Қайд этилишича, ҳуқуқни муҳофаза қилувчи органлар томонидан ҳолат ўрганилган ҳамда уларга нисбатан Маъмурий жавобгарлик тўғрисидаги кодексининг 111-моддаси (Ҳайвонларга нисбатан шафқатсиз муносабатда бўлиш) билан маъмурий баённомалар расмийлаштирилган.

Суд қарорига кўра, ҳуқуқбузарларнинг ҳар бирига базавий ҳисоблаш миқдорининг 10 баравари, яъни 4 миллион 120 минг сўмдан жарима жазоси тайинланган.

Воқеадан сўнг, йигитлар қилган ишларидан пушаймон эканини билдириб, жамоатчиликдан узр сўраган.

“Жавоҳир мушукни олиб отган, мен эса видеога олганман. Ўша пайтда уни тўхтатишим керак эди, лекин бундай қилмаганман. Бу ишимиздан қаттиқ пушаймонмиз, бошқа такрорланмайди. Бошқаларга ҳам бундай ҳаракатларни тавсия қилмаймиз”, дея таъкидлаган улар.

Билдирилишича, ҳайвонларга нисбатан шафқатсиз муносабат нафақат ахлоқий меъёрларга, балки қонунчилик талабларига ҳам зид. Ижтимоий тармоқларда машҳурликка эришиш ёки кўпроқ аудитория йиғиш мақсадида қонунга хилоф ҳаракатларни содир этиш жавобгарликка сабаб бўлади.

Эслатиб ўтамиз, аввалроқ Россиянинг Челябинск шаҳрида Ўзбекистон фуқароси ёввойи ҳайвонлар бошпанасида силовсинга яқинлашишга урингани ортидан жаримага тортилгани ҳақида хабар берилган эди.