Киевга Тоmаhаwk бериш ядровий урушни қўзғатади – Лукашенко

АҚШ томонидан Украинага Тоmаhаwk ракеталарининг берилиши кескинлашувга ва дунёни ядро уруши ёқасига олиб келиши мумкин. Бу ҳақда беларуслик Александр Лукашенко кеча, 14 октябрь куни ҳукумат йиғилишида маълум қилди.

Лукашенконинг сўзларига кўра, Россия раҳбарияти “Украинада тинчлик ўрнатишни” мақсад қилган.

“Ҳеч қандай Президент (Украинадаги урушни тўхтатишни) масалани ҳал қилмайди. Бу ядро урушигача бўлган вазиятни кескинлаштиради. Эҳтимол, буни (АҚШ Президенти) Дональд Трамп ҳаммадан кўра яхшироқ тушунади, у Президент Зеленский умид қилганидек, бу ўлим қуролини беришга ва Россиянинг ичкарисига зарба беришга рухсат беришга шошилмаяпти”, дейди у.

Маълумотларга кўра, Американинг Тоmаhаwk қанотли ракеталарининг Украинага топширилиши Россиянинг 2000 га яқин ҳарбий объектларини йўқ қилиш хавфини туғдиради.

Маълумот учун, Тоmаhаwk – АҚШда ишлаб чиқилган узоқ масофали қанотли ракета бўлиб, асосан, ерга қарши ҳужумлар учун мўлжалланган. У субсоник тезликда, тахминан Мач 0.7–0.8 (900 км/соат атрофида) учади ва 1 600 километргача масофадаги нишонларни уришга қодир. Ракетани кемалар ёки сувости кемаларидан учириш мумкин. Тоmаhаwk GPS, инерция ва рельефга асосланган навигация тизимлари орқали йўналтирилади, бу эса унга паст баландликда парвоз қилиб, душман радарларидан яшириниш имконини беради. Шу сабабли, у аниқ, узоқ масофали ва стратегик жиҳатдан муҳим қуроллардан бири ҳисобланади.

Эслатиб ўтамиз, аввалроқ АҚШ Киевга Тоmаhаwk – узоқ масофали қанотли ракетасини бермоқчилиги маълум қилинганди.