Кинематография агентлигига янги раҳбар тайинланди

Шуҳрат Ризаев Кинематография агентлигига раҳбар этиб тайинланди. Бу ҳақда Миллий кинематографияни ривожлантириш маркази ахборот хизмати хабар берди.

Шуҳрат Ризаев 2017 йилдан буён агентлик директори ўринбосари лавозимида фаолият юритиб келаётганди.

У 1958 йил 10 июлда Тошкент шаҳрида туғилган. Ўзбекистон Миллий университетининг филология факультетини тугатган. Маданият ва спорт ишлари вазирлигида, Ойбек музейида, Президент девони ва Вазирлар Маҳкамасида, Давлат ва жамият қурилиши академиясида фаолият юритган.

2017 йилда Президент Шавкат Мирзиёев фармони асосида "Дўстлик" ордени билан мукофотланган. 2021 йилда эса "Ўзбекистонда хизмат кўрсатган ёшлар мураббийси" фахрий унвонига сазовор бўлган.

Эслатиб ўтамиз, олдинроқ Кинематография агентлигининг олдинги директори Фирдавс Фридунович Абдухолиқов Ўзбекистондаги Ислом цивилизацияси маркази директори этиб тайинланиши муносабати билан, лавозимидан озод этилганди.