Ким урушда ҳалок бўлганлар учун қурилаётган ёдгорлик билан танишди

Кеча, 13 февраль куни Шимолий Корея етакчиси Ким Чен Ин Россия–Украина урушида ҳалок бўлганлар хотирасига қурилаётган ёдгорликни кўздан кечирди. Бу ҳақда Корея Марказий Ахборот Агентлиги хабар берди. 

Агентликка кўра, Ким Чен Ин хориждаги ҳарбий операцияларда иштирок этган Корея Халқ Армияси аскарлари кўрсатган беқиёс жасорат ва қаҳрамонлик тарихда муҳрланиши кераклигини таъкидлаган.

Маълум қилинишича, 2025 йилнинг октябрь ойида “Жанговар қаҳрамонликлар мемориал музейи” қурилиши бошланган. Ўшанда Ким Чен Ин Москва билан алоқалар ўзининг энг юқори босқичига чиққанини таъкидлаган.

Жанубий Корея ва Ғарб разведка маълумотларига кўра, Шимолий Корея Россия томонида жанг қилиш учун минглаб аскар юборган. Қайд этилишича, камида 600 нафар шимолий кореялик аскар жангларда ҳалок бўлган, минглаб аскарлар яраланган. Шунингдек, Пхеньян Россияга артиллерия снарядлари, ракеталар ва узоқ масофали ракета тизимларини етказиб берган. Таҳлилчиларга кўра, бунинг эвазига Россия Шимолий Кореяга молиявий ёрдам, ҳарбий технологиялар, озиқ-овқат ва энергия ресурсларини тақдим этган.

Эслатиб ўтамиз, аввалроқ Шимолий Кореяда Жанубий Корея телевидениесини томоша қилган фуқароларга нисбатан қаттиқ жазоларни қўллаётгани ҳақида хабар берилганди.