Ким Чен Ин йирик калибрли ракеталарнинг отишма машғулотларини ўтказди

Шимолий Корея етакчиси Ким Чен Ин ўта йирик калибрли ракета тизимларидан фойдаланган ҳолда отишма машғулотларини ўтказди. Бу ҳақда Корея марказий ахборот агентлиги хабар берди.

“Корея Ишчилар партияси Бош котиби, Давлат ишлари бўйича раиси, муҳтарам ўртоқ Ким Чен Ин 18 март куни тегишли бўлинмаларнинг отиш машғулотларини шахсан назорат қилди”, дейилади агентлик хабарида. 

Таъкидланишича, отишма машғулотларидан мақсад "қурол тизимларининг кучи ва жанговар имкониятларини тасдиқлаш" бўлган.

Қайд этилишича, Ким Чен Ин ўт очиш жойларини кўздан кечирган, у ерда ўт очишни автоматик бошқариш тизими билан танишган, жанговар жойлашиш вақтини, тактик маълумотларни ўрганган, шунингдек, ўт очиш хизмати вақтида артиллериячиларнинг ҳаракатини кузатган.

Шундан сўнг, Шимолий Корея раҳбари отишмага буйруқ берган. Ким Чен Ин “кутилмаган жанговар топшириқни бажаришда артиллериячилар юқори манёвр, аниқ ва кучли зарба бериш қобилиятини намойиш этганидан катта мамнуният изҳор этган”.

Агентликнинг ёзишича, ўт очиришдан сўнг, нишондан маълум бир баландликда ҳавода ўта йирик ракета ўқ отувчи қурол ёрдамида симуляция қилинган портлаш синови ўтказилган.

Эслатиб ўтамиз, Шимолий Корея кеча, 18 март куни Япон денгизи томон бир нечта қисқа масофали баллистик ракеталарни учирганди. Учириш Сеул ва Вашингтон Озодлик қалқони йиллик машғулотларини якунлаганидан бир неча кун ўтиб, АҚШ Давлат котиби Энтони Блинкен Сеулга келган куни амалга оширилди. У 30 га яқин давлатдан юқори даражадаги ҳукумат амалдорлари таклиф этилган саммитда иштирок этиш учун Жанубий Кореяга борган.

Улканбаева Райҳона