Хорижда ресторан очган ўзбекистонликларга харажатининг ярми қайтарилади

Хорижда ўзбек миллий таомлари ресторанини очган ёки очмоқчи бўлган тадбиркорлар харажатларининг 50 фоизигача бўлган қисмини давлатдан субсидия сифатида олиши мумкин. Бу ҳақда Ягона интерактив давлат хизматлари порталининг Telegram-каналида хабар берилди.

Қайд этилишича, ушбу хизмат Туризм қўмитаси томонидан бепул кўрсатилади. Ундан Ўзбекистонда рўйхатдан ўтган тадбиркорлар фойдаланиши мумкин.

Субсидия олиш учун хорижда рўйхатдан ўтган ресторан ва бино ҳуқуқини тасдиқловчи ҳужжатлар, санитария ҳамда ёнғин хавфсизлиги талабларига мувофиқликни тасдиқловчи маълумотлар тақдим этилиши керак. Шунингдек, амалга оширилган харажатлар ва Ўзбекистондан маҳсулот етказиб берилганини тасдиқловчи ҳужжатлар ҳамда рестораннинг ички ва ташқи фотосуратлари талаб этилади. Зарур ҳолларда ҳужжатларнинг расмий таржимаси ҳам тақдим қилинади.

Аризалар 18 иш куни ичида кўриб чиқилади. Ижобий қарор қабул қилинган тақдирда, субсидия маблағлари 7 иш куни ичида тадбиркорнинг банк ҳисобварағига ўтказилади. Аризада камчиликлар аниқланса, уларни тузатиб, қайта топшириш мумкин.

Тадбиркорлар субсидия олиш учун аризани my.gov.uz портали (Ягона интерактив давлат хизматлари портали) орқали юборишлари мумкин.

Эслатиб ўтамиз, аввалроқ Ўзбекистонда айрим тиббиёт ходимларига уй сотиб олишга субсидия берилиши ҳақида хабар қилинган эди.