Холанд трансфери йўлида “Барса” олдида муаммо пайдо бўлди

Френки де Йонг ёзда “Барселона”дан кетмоқчи эмас

“Барселона” жамоаси Эрлинг Холандни сотиб олиш учун клубнинг энг асосий ўйинчиларидан бири бўлган Френки Де Йонгдан воз кечади, деган маълумот тарқалганди.

Жоан Лапорта “Барселона” раҳбарлигига келишидан олдин, каталон клуби президенти бўлган Хосеп Бартомеунинг нотўғри юритган трансфер сиёсати туфайли, “кўк анор ранглилар” 1 млрд доллардан ортиқ қарз бўлиб қолган. Шунинг учун, каталон клубида янги трансферларга маблағ кўп эмас. “Боруссия Дортмунд” ҳужумчиси Эрлинг Холанд эса ўта қиммат футболчи ҳисобланади. Шу сабабдан, “Барселона” Холанддан қуруқ қолиши мумкин.
 
Френки  каталониядан кетмоқчи эмас ва ёзда бошқа таклифларга эътибор қаратмайди. “Барселона” таркибидаги энг қиммат футболчиларидан бирини сота олмас экан, Холанд масаласи янада қийинлашади.

Унинг бундай қарорга келишига Хавининг “Барселона” қайтиши ва ўйин савиясининг кўтарилиши сабаб бўлиши мумкин. Бунинг исботи сифатида “кўк анор ранглилар”нинг  “Атлетико Мадрид”га қарши ўйинини мисол қилиб келтириш мумкин. Кўпчилик “матрасчилар”га қарши баҳсда “Барселона” яхши ўйин кўрсатганини эътироф этди. Де Йонг шуларни ҳисобга олган ҳолда, “Барселона”да қолишни яхши деб топган бўлиши мумкин.

Маълумот ўрнида, Френки де Йонг Ла Лигада 18 та учрашувда майдонга тушиб, 2 та гол ва 2 та голли узатма амалга оширган. “Transfermarkt” портали уни 70 миллион еврога баҳоламода. Нидерландиялик учун 2019 йили “Барселона” Аместрдамнинг “Аякс” клуби ҳисобига 75 миллион евро ўтказиб берган эди.

Маъруф Абдумаликов