ХОҚ Россия ва беларуслик спортчиларнинг халқаро мусобақалардаги иштирокини чеклади

Халқаро Олимпия Қўмитаси Россия ва беларуслик атлетларнинг халқаро мусобақаларда қатнашиши тўғрисидаги қарорни кейинга қолдирди. Бу ҳақда Қўмита расмий саҳифасида маълум қилинди. 

Хабарда айтилишича, Қўмитанинг 2022 йилнинг 9 декабрь санасида бўлиб ўтган 11-саммитида Россия ва Беларусь паспортига эга атлетларнинг индивидуал нейтрал спортчилар сифатида халқаро мусобақаларга қатнашиш йўлларини излаш бўйича вазифа қўйилган. Икки мамлакат спортчиларининг Париж–2024 олимпиадасида иштирок этиши бўйича эса ҳеч қандай маслаҳатлашув амалга оширилмаган. Шунга кўра, қўмита халқаро спорт федерациялари ва спорт тадбирлари ташкилотчиларига қуйидагиларни тавсия қилган: 

1) Россия ёки Беларусь паспортига эга бўлган спортчилар фақат индивидуал нейтрал атлет сифатида мусобақаларда қатнашади.

2) Россия ва Беларусь спортчиларининг натижаси терма жамоалари ҳисобига қўшилмайди.

3) урушни фаол қўллаб-қувватлаган спортчилар мусобақаларда қатнашмайди. Худди шундай урушни қўллаган ёрдамчи ходимлар ҳам мусобақаларга қўйилмайди.

4) Россия ва Беларусь ҳарбий ёки миллий хавфсизлик идоралари билан шартнома тузган спортчилар мусобақаларда қатнаша олмайди. Россия ва Беларусь ҳарбий ёки миллий хавфсизлик агентликлари билан шартнома тузилган ёрдамчи ходимларни киритиш мумкин эмас.

5) ҳар қандай якка тартибдаги нейтрал спортчи, бошқа барча иштирокчи спортчилар сингари, уларга нисбатан қўлланиладиган барча антидопинг талабларига, хусусан, халқаро федерацияларнинг антидопинг қоидаларида белгиланган талабларга жавоб бериши керак. 

6) уруш учун жавобгар шахсларга, Россия ва Беларусь давлатлари ва ҳукуматларига қарши санкциялар ўз кучида қолиши керак. Жумладан:

а) Россия ёки Беларусда халқаро спорт федерациялари ёки Миллий олимпия қўмиталари томонидан халқаро спорт тадбирлари ўтказилмайди;

б) ҳеч қандай спорт тадбири ёки учрашувида, шу жумладан, бутун майдонда ушбу мамлакатларнинг байроғи, мадҳияси каби миллий белгиларидан фойдаланилмайди;

в) ҳеч бир Россия ва Беларусь ҳукумат ёки давлат амалдори халқаро спорт тадбирлари ёки учрашувларига таклиф қилиниши ёки аккредитация қилиниши мумкин эмас.

Эслатиб ўтамиз, олдинроқ агар россиялик ва беларуслик спортчилар Париж Олимпиадасида нейтрал сифатида қатнашса, Украина мусобақани бойкот қилиши айтилганди. Кейинчалик Польша Спорт ва туризм вазири Камил Бортничук ҳам жаҳоннинг 40 га яқин давлатлари кейинги Олимпиада ўйинларини бойкот қилиши мумкинлигини айтди. ХОҚ президенти Томас Бах эса спортнинг вазифаси давлатлар ўртасидаги қарама-қаршилик ва кескинлашувнинг кучайишига ҳисса қўшиш эмас, балки одамларни бирлаштириш эканини таъкидлаган.

Нодиржон Мадаминов