Хитойда пора олган амалдор ўлимга ҳукм қилинди

Хитойда суд Ханчжоу электрон тижорат маркази коммунистик партиясининг собиқ раҳбари Чжоу Цзянъюнни порахўрликда айблаб, шартли ўлим жазосига ҳукм қилди. Бу ҳақда “South China Morning Post” нашри хабар берди.

Айтилишича, амалдор олган пораларнинг умумий миқдори тахминан 25 миллион долларни ташкил қилган. Тергов мансабдор шахснинг коррупцион схемалардаги иштирокини исботлашга муваффақ бўлган. Манбага кўра, у ташкилотлар ва жисмоний шахслардан пул олган. Бунинг эвазига Чжоу Цзянъюн ер билан боғлиқ муаммоларни ҳал қилишга ва қурилиш лойиҳаларига ёрдам берган.

Қайд этилишича, маҳкум 2001 йилдан буён шундай шартномаларни имзолаб келган. Ўша пайтда у туман ҳокими ўринбосари лавозимида бўлган.

Билдирилишича, сиёсатчининг ўлим жазоси икки йиллик синов муддатидан сўнг умрбод қамоқ жазосига алмаштирилиши ҳам эҳтимолдан холи эмас. Бироқ Чжоу Цзянъюн сиёсий ҳуқуқлардан маҳрум қилинади ва мулки эса мусодара қилинади.