Xitoy vakili Mirziyoyevga Si Szinpinning salomini yetkazdi
Jamiyat
−
01 aprel
3042O‘zbekiston Respublikasi Prezidenti Shavkat Mirziyoyev bugun, 1 aprel kuni Xitoy Xalq Respublikasi Kommunistik partiyasi Markaziy qo‘mitasi Xalqaro aloqalar bo‘limi mudiri Lyu Szyanchao boshchiligidagi delegatsiyani qabul qildi. Bu haqda Prezident matbuot xizmati xabar berdi.
Bildirilishicha, yuqori martabali mehmon davlat rahbariga Xitoy Raisi Si Szinpinning salomi va eng ezgu tilaklarini yetkazgan.
Uchrashuvda oliy darajada erishilgan kelishuvlarga muvofiq O‘zbekiston bilan Xitoy o‘rtasidagi ko‘p qirrali hamkorlik va amaliy sheriklikni yanada kengaytirish masalalari ko‘rib chiqilgan.
“Keyingi yillarda O‘zbekiston-Xitoy do‘stlik va barcha sharoitlarda har tomonlama strategik sheriklik munosabatlarida yuksak darajaga erishilgani alohida mamnuniyat bilan qayd etildi.
O‘zaro tovar ayirboshlash va investitsiyalar hajmi barqaror oshib bormoqda, iqtisodiyotning ustuvor tarmoqlarida yetakchi kompaniyalar ishtirokidagi qo‘shma loyiha va korxonalar soni ko‘paymoqda”, deyiladi xabarda.
Shuningdek, "Xitoy - Qirg‘iziston - O‘zbekiston" temiryo‘lini qurish loyihasi bo‘yicha amaliy ishlar olib borilmoqda. Faol hududlararo aloqalar va madaniy-gumanitar almashinuv yuqori baholandi. Joriy yilda navbatdagi Hududlar forumi va Ta’lim forumi bo‘lib o‘tadi.
Bundan tashqari, parlamentlararo va partiyalararo hamkorlikni, ayniqsa, kambag‘allikni qisqartirish, korrupsiyaga qarshi kurashish, raqamlashtirish va sanoatlashtirishni jadallashtirish kabi sohalarda yanada kengaytirish zarurligiga alohida e’tibor qaratilgan.
Oliy va professional ta’lim sohasida hamkorlikni yanada rivojlantirish, jumladan, O‘zbekistonda Xitoyning yetakchi oliy ta’lim muassasalari filiallarini ochish muhimligi qayd etildi.
Eslatib o‘tamiz, oldinroq Toshkent viloyatining Chirchiq shahrida joylashgan sobiq texnikum binosi buzilib, uning o‘rniga Xitoyning nufuzli oliy ta’lim muassasasining filiali tashkil etilishi xabar qilingandi.
LiveBarchasi
Trenddagilar


