Хитой санкциялар туфайли Россия нефти ортилган танкерларни қабул қилмаяпти

АҚШ санкциялари остида бортида 2 миллион баррель нефть бўлган учта рус танкери Хитойнинг Шандун провинциясидаги портларга яқинлашаётганда тўхтаб қолди. Бу ҳақда кеча, 13 январь куни "Bloomberg" хабар берди.

Kpler кема кузатуви маълумотларига кўра, Olia, Mermar ва Huihai Pacific кемалари Россиянинг Тинч океанидаги Находка яқинидаги Козмино портидан Хитойга нефть олиб кетаётган бўлган.

Нефть танкерларининг тўхтаб қолишига бевосита сабаб сифатида Хитой шарқидаги Шандун провинциясидаги йирик портларни бирлаштирган Хитойнинг Shandong Port Group порт гуруҳи портларига тўхташ тақиқлангани айтилди.

АҚШ санкциялари остида нефть кемаларининг ушбу порт тармоғига киришини тақиқлаш тўғрисида бир ҳафта олдин "Reuters" хабар берган.

10 январь куни АҚШ Президенти Жо Байден маъмурияти Россиянинг энергетика секторига қарши энг қаттиқ санкцияларни жорий қилди. Чеклов чоралари АҚШ расмийлари Россия томонидан нефть ташиш соҳасидаги санкцияларни четлаб ўтиш учун фойдаланиладиган Россиянинг "соя флоти" таркибига кирувчи 183 та кемага таъсир кўрсатди. Россия кемалари бошқа ҳудудларда ҳам нефтни туширишда муаммоларга дуч келди.

"The Bell" газетасининг хабар беришича, Cool Rover газ ташувчиси Испания қирғоқлари яқинида санкциялар рўйхатига киритилган "Газпром" заводидан ЛНГ партияси билан лангар ташлаган. Газ танкери қаерга йўналтирилиши ҳозирча номаълум.