Хитой Эронга ёрдам беришга тайёрланмоқда – АҚШ разведкаси

АҚШда Хитой Эронга молиявий ёрдам кўрсатиш, шунингдек, ракеталар учун эҳтиёт қисмлар ва компонентлар етказиб беришга тайёргарлик кўраётгани ҳақида разведка маълумотлари мавжуд. Бу ҳақда вазиятдан хабардор манбаларга таяниб CNN хабар берди.

“Хитой ўз қўллаб-қувватлашида анча эҳтиёткор. У уруш тугашини хоҳлайди, чунки бу унинг энергия таъминотига таҳдид солади”, дейди телеканал манбаларидан бири.

“The Washington Post” манбаларига кўра, икки давлат ўртасидаги яқин алоқаларга қарамай, Хитой ҳозирча Эронга ёрдам бермаяпти.

“Reuters” 5 март куни Хитой Эрон билан Ҳормуз бўғози орқали нефть танкерлари ва Қатар суюлтирилган табиий гази ортилган кемаларнинг хавфсиз ўтишини таъминлаш бўйича музокаралар олиб бораётганини хабар қилган. Нашр манбаларига кўра, ўз нефтининг қарийб 45 фоизини ушбу бўғоз орқали импорт қиладиган Пекин Теҳрондан танкерлар учун хавфсиз йўлак талаб қилмоқда.

“The Washington Post” нашрининг ёзишича, Россия Эронга Яқин Шарқ мамлакатларидаги Америка ҳарбий объектларига зарба бериш учун маълумотлар тақдим этмоқда. Нашр манбаларига кўра, Россия томонидан берилган маълумотлар Америка кемалари ва самолётлари ҳақидаги ахборотни ўз ичига олади. Россия ёрдами кўлами ҳозирги босқичда тўлиқ аниқ эмас.

Эслатиб ўтамиз, аввалроқ АҚШ Мудофаа вазири Пит Ҳегсет Россия Эронга АҚШ қўшинларининг жойлашуви ва ҳаракатлари ҳақида разведка маълумотлари бераётгани ҳақидаги хабарларни изоҳлаб, Вашингтон бу маълумотларни тасдиқламаслигини, бироқ вазиятни диққат билан кузатаётгани ва зарур чораларни кўраётганини айтди.