Хитой дунёдаги энг узун парвозни йўлга қўйди

Хитойнинг China Eastern Airlines авиакомпанияси дунёдаги энг узун тўғридан тўғри рейс – Шанхай ва Буэнос-Айресни боғлайдиган янги йўналиш учун чипталарни сотишни бошлади. Бу ҳақда CNN хабар берди.

Маълумотларга кўра, жорий йилнинг 4 декабрь куни биринчи сафарини амалга оширадиган Boeing 777-300 ER самолёти Шанхай- Пудонг халқаро аэропортини Аргентинанинг Министро Пистарини халқаро аэропорти билан боғлайди.

Авиакомпания маълумотларига кўра, Хитойдан бориш сафари тахминан 25 соат, Буэнос-Айресдан қайтиш эса қарийб 29 соат давом этади. Иккала парвозда ҳам учоқ Янги Зеландиянинг Окленд шаҳрида икки соатлик техник тўхтаб ўтишни амалга оширади. Бунда йўловчилар самолётни қисқа муддатга тарк этишлари мумкин. Шу тўхтаб ўтишда ҳам парвоз дунёдаги энг узун рейс сифатида баҳоланмоқда.

Шунингдек, China Eastern Airlines компанияси ушбу хизматни антиподал шаҳарларни (дунёнинг қарама-қарши тарафида жойлашган шаҳарлар) боғлайдиган дунёдаги биринчи йўналиш сифатида илгари сурмоқда. Авиакомпания ҳафтасига икки марта Boeing  777-300ER учоқларида парвозни амалга оширишни режалаштирган.

“Компания Антарктида яқини бўйлаб жанубий парвоз йўлини танлади, бу эса мавжуд танловларга қараганда, саёҳатни камида тўрт соатга қисқартиради”, дея қўшимча қилинади хабарда.

Маълумот учун, “Дунёдаги энг узун парвоз” даъвоси рақобатчилардан холи эмас. Singapore Airlines 18 соатдан кўпроқ вақт ичида 15 минг 349 километрни босиб ўтган. Шунингдек, Австралиянинг Qantas компанияси ўн йил охиригача Сидней-Лондонга тўхтовсиз қатновларни йўлга қўйиш режасини ишлаб чиқмоқда.

Эслатиб ўтамиз, аввалроқ АҚШнинг Жоржия штатидаги Ҳартсфилд-Жексон Атланта халқаро аэропортида Delta Air Lines авиакомпаниясига тегишли бўлган Boeing 757 самолётининг двигатели ёниб кетган эди.

Бунёд Келдибоев