Хелайфининг FIFA президентлиги учун позицияси маълум бўлди

“Пари Сен-Жермен” клуби президенти Носир Ал-Хелайфи FIFA президентлиги учун ўз номзодини қўйиш ниятида эмаслигини айтди. Бу ҳақда қатарлик функционернинг вакили “L’Équipe” нашрига маълум қилди.

“Жаноб Ал-Хелайфида FIFA президенти лавозимига нисбатан мутлақо ҳеч қандай амбиция, ният ёки қизиқиш йўқ. Оммавий ахборот воситаларидаги хабарлар ҳам буни ўзгартирмайди. Аксинча, у жаҳон ва Европа футболининг барча институтларини оқилона ва конструктив тарзда қўллаб-қувватлашда давом этади”, дейди ПСЖ президентининг вакили.

Аввалроқ, “Politico” нашри Европа футболи расмийлари Ал-Хелайфининг FIFA президентлиги учун номзодини илгари суриш имкониятини муҳокама қилаётгани ҳақида хабар берган эди.

Маълумот учун, FIFA’нинг амалдаги президенти Жанни Инфантино аввалроқ 2027 йил март ойида бўлиб ўтадиган сайловда яна ўз номзодини қўйиш нияти борлигини билдирган. У 2016 йилдан буён FIFA президенти лавозимида ишлаб келмоқда.

Носир Ал-Хелайфи эса 2011 йилдан бери “Пари Сен-Жермен” жамоаси президенти ҳисобланади. Шунингдек, у клуб эгаси бўлган Qatar Sports Investments (QSI) ташкилотини бошқаради. 2021 йилда Ал-Хелайфи Европа клублари ассоциацияси раиси этиб сайланган.