“Кераксиз болалар” кимга керак?

Охирги йилларда ўзбек футболида ижобий ўзгаришлар бўлаётгани барчага бирдек аён. Миллий терма жамоа Жаҳон чемпионати учун юришини муносиб тарзда давом эттирмоқда, Олимпия жамоаси эса мамлакат тарихида илк бор тўрт йилликнинг энг йирик спорт ўйинларига йўлланмани қўлга киритди. Ўзбек футболчилари хорижнинг бир қатор клубларида муносиб тарзда тўп суриб, чарм тўп мухлисларининг эътирофига сазовор бўлмоқда.

Ўзбекистонда футбол қамрови кенгаяётгани ҳам бор гап. Сўнгги йилларда фахрийлар, маҳаллалар, талабалар ва бошқа бир қатор ёш ҳамда аҳоли вакиллари ўртасида футбол турнирлари ўтказилаётганини ҳам айтиш мумкин, бироқ бутун дунёда анча оммалашиб улгурган медиа футбол Ўзбекистонда бироз эътибордан четга қолаётганга ўхшайди.

Бир неча йилдирки, мамлакатда оддий ҳаваскор болалардан иборат “Анвонтед бойс” (“Unwanted boys”) деб номланган медиа клуб ташкил этилган. Охирги пайтларда бу жамоа йигитлари турли хил қизиқарли футбол контентлари тайёрлаб, ижтимоий тармоқларда етарлича кузатувчини тўплаб қўйди. Улар иштирокидаги футбол ўйинларини кўриш учун эса минглаб ёш мухлислар стадионга борадиган бўлди. Аммо QALAMPIR.UZ'га маълум бўлишича, жамоа ҳар бир ўйини олдидан ташкилий масалаларда, айниқса ҳуқуқ тартибот органлари билан боғлиқ қатор муаммоларга дуч келади.

Ҳозирга қадар Ўзбекистондаги ҳеч бир футболга оид ташкилотлар ҳам “Анвонтед бойс” жамоасининг ўйинлари учун ёрдам қўлини чўзмаган. 

Жорий йил 9 июнь куни “Анвонтед” йигитлари Ўзбекистон Суперлигасининг “Локомотив” клуби билан ўйин ўтказиши керак бўлган. Бироқ, клуб яна ташкилий масала ва ҳуқуқ тартибот органлари ходимларининг ўйинга келмаслиги билан боғлиқ муаммога дуч келган ва учрашув бекор қилинган.

QALAMPIR.UZ бугунги кунда юқорида айтилган муаммоларга қарамай, медиа футболни ривожлантириб, Ўзбекистонда миллионлар ўйинини янада оммалаштиришга ҳаракат қилаётган “Анвонтед бойс” жамоаси асосчиси Ислом Абдужабборовга микрофон тутди.

“Нега бизда ҳаммага бир хил муносабат бўлмайди? Хавфсизлик ходимлари Ўзбекистон чемпионати ўйинларида ўз ишини бажаради-ку, нега улар бизга қўпол муомалада бўлади. Бизнинг ҳеч кимга адоватимиз йўқ, шунчаки Ўзбекистонда футболни ривожлантирмоқчимиз”, дейди Абдужабборов.

Шунингдек, интервью давомида Ислом Абдужабборов “Анвонтед бойс”нинг келгуси режалари, медиа футбол йўналишини ривожлантириш бўйича ўйлаган лойиҳалари ҳақида айтиб ўтди.

Маълум бўлишича, “Анвонтед” йигитлари бир неча кун ичида ўзбекистонлик афсонавий футболчи Сервер Жепаров бошчилигида Россиянинг Қозон шаҳрига йўл олади ва у ерда фижитал-футбол бўйича халқаро турнирда Ўзбекистон шарафини ҳимоя қилади.