Келаси йилда Трамп ва Путин учрашади – WP

АҚШнинг сайланган президенти Дональд Трамп ва Россия етакчиси Владимир Путин келаси йили Украинадаги вазиятни муҳокама қилиш учун учрашади. Бу ҳақда “The Washington Post” хабар берди.

Нашрга кўра, икки етакчининг учрашуви Москва ва Киев ўртасидаги можарони ҳал қилишга бағишланади. Қайд этилишича, Москва муросага келишга тайёр эмас, чунки жанг майдонидаги вазият унинг фойдасига ривожланиб боряпти.

Қолаверса, нашрда Кремль Трампнинг Украина бўйича тезкор келишувга эришиш истагига қарамай, музокараларни узоқ давом этадиган жараёнга айлантиришга интилаётгани ҳам таъкидланган.

“Аслида, бу Трамп-Путин саммити дунёни таъсир доираларига бўлиб, Россиянинг Украина, Грузия ва НАТОга аъзо бўлмаган собиқ совет  қўшнилари устидан Россия устунлигини кафолатлашини англатади”, дейилади хабарда.

Шу билан бирга, газетанинг таъкидлашича, томонлар “Путиннинг мукаммал позицияси” ва Трампнинг “заиф кўриниш” қўрқуви туфайли келишувга эриша олмайди.

Эслатиб ўтамиз, WP жорий йилнинг 7 ноябрь куни АҚШнинг сайланган президенти Дональд Трамп Россия Президенти Владимир Путин билан норасмий телефон мулоқоти ўтказгани ва суҳбат чоғида Россиянинг Украинага қарши уруши мавзусини кўтаргани ҳақида ёзган эди. Кремль матбуот котиби Дмитрий Песков Трамп ва Путин телефон орқали мулоқот қилгани ҳақидаги хабарлар ҳақиқатга тўғри келмаслигини айтди.