Каримовнинг ўғли хотинини нима учун калтаклагани маълум бўлди

Ўзбекистоннинг Биринчи Президенти Ислом Каримовнинг ўғли Пётр Каримов Россиянинг Красногорск шаҳрида хотинини калтаклаганликда гумонланиб, ушланганди. Унинг рафиқаси Юлия Сметанкина турмуш ўртоғи билан жанжал пул сабабли бошланганини маълум қилди. Бу ҳақда “112” Telegram-каналида келтирилган.

Пётр Каримовнинг рафиқаси эри қўйиб юборилгандан сўнг ғойиб бўлганини ва у бу ҳақда тегишли органларга мурожаат қилмоқчилигини айтган. 

“Пётр уйга маст ҳолда келган ҳамда хотинидан Тошкентга чипта ва меҳмонхона учун пул талаб қилган. Рад этилгач, у ғазабланиб, хотинига ҳужум қилган. Каримов Юлиянинг бошига телефон билан уриб, юзини ёниб турган печкага қўйган”, дейилади хабарда.

Юлия Сметанкинанинг қайд этишича, аввал ҳам эри уни урган, лекин у ҳеч қачон бунчалик қаттиқ калтакламаган.

Аниқланишича, Пётр мерос бўйича судда иштирок этиш учун Ўзбекистонга кетмоқчи бўлган.

Маълумот учун, Пётр Каримов Ўзбекистоннинг Биринчи Президенти Ислом Каримовнинг Наталья Кучми билан биринчи турмушидан ўғли экани айтилади.