Кападзе Каннаваронинг штатида ёрдамчи мураббий сифатида ишлайди

Ўзбекистон миллий терма жамоасининг собиқ бош мураббийи Темур Кападзе италиялик мутахассис Фабио Каннаваро бошчилигидаги янги штабда ёрдамчи мураббий сифатида ишлайди. Бу ҳақда бугун, 6 октябрь куни Миллий футбол марказида бўлиб ўтаётган  матбуот анжуманидан QALAMPIR.UZ мухбири хабар берди.

Маълумки, бугун, 6 октябрь куни Ўзбекистон футбол ассоциацияси италиялик мутахассис Фабио Каннаваро билан шартнома тузди. 

Мураббийлар штабида Каннаварога Кападзедан ташқари қуйидаги мутахассислар ҳам ёрдам беради:

• Аужениё Албарелла — ёрдамчи мураббий (Япония терма жамоаси, “Ювентус”, “Удинезе” ва “Динамо Загреб”да ишлаган);
• Троизе Францеско — жисмоний тайёргарлик бўйича мураббий (“Беневенто”, “Удинезе” ва “Динамо Загреб”да фаолият юритган);
• Антонио Кименти — дарвозабонлар мураббийи (Италия ёшлар терма жамоаси, “Сампдориа” ва “Спал” клубларида ишлаган).

Маълумот учун, Темур Кападзе Ўзбекистон U-23 терма жамоасини Париж-2024 Олимпиадасига олиб чиққан. Шунингдек, у мазкур жамоа билан Осиё кубоги кумуш медалини қўлга киритган. Жорий йил январда Темур Кападзе миллий терма жамоа мураббийи этиб тайинланди ва Ўзбекистонни тарихда илк бор Жаҳон чемпионатига олиб чиқди.

Янги бош мураббий Фабио Каннаваро эса футболдаги фаолиятини якунлагач, Яқин Шарқ ва Хитой клубларини бошқарган. 2019 йилда у Хитой терма жамоаси бош мураббийи этиб тайинланган. 2022 йилдан 2023 йилгача Италиянинг “Беневенто” клуби бош мураббийи бўлиб ишлаган. 2024 йилнинг апрелида у “Удинезе” (Италия) жамоасини қабул қилиб олган ва бир муддат ишлаган.  Шундан сўнг, Каннаваро Хорватиянинг “Динамо Загреб” клубида ҳам бош мураббий сифатида фаолият юритган.