Қурманбек Бакиевнинг укаси Ўзбекистонда вафот этди – ОАВ

Қирғизистоннинг собиқ президенти Қурманбек Бакиевнинг укаси Аҳмат Бакиев Ўзбекистонда вафот этди. Бу ҳақда ўз манбаларига таяниб, бугун, 13 апрель куни “Sputnik Қирғизистон” хабар берди.

Қайд этилишича, унинг жасади бугун Жалолобод вилоятига олиб борилиши керак. Бакиев ўзининг туғилиб ўсган Масадан (Тейит) қишлоғида дафн этилиши айтилмоқда.

“24.kg” нашрига кўра, у сўнгги йилларда Ўзбекистон ҳудудида яшаб келган. Шунингдек, Аҳмат Бакиевнинг узоқ вақт давомида касал бўлгани айтилмоқда. Ўлимнинг аниқ сабаби ҳозирча очиқланмаган. 

Маълумот учун, Аҳмат Бакиев – Қирғизистон Республикаси собиқ президенти Қурманбек Бакиевнинг туғишган укаси. 2010 йилги Апрель инқилобидан кейин у бир қатор жиноий ишлар марказида қолган. 2012 йилда суд уни оммавий тартибсизликларни ташкил этишда айбдор деб топган. У озодликдан маҳрум этилиб, жазони манзил-колонияда ўтаётган эди. Кейинчалик Аҳмат Бакиев муассасани тарк этган ва ҳуқуқ-тартибот идоралари маълумотига кўра, ғойиб бўлган. Ўшандан бери, ОАВ хабарларига кўра, у Қирғизистон ташқарисида бўлган ва қидирувга берилган. Ўтган йиллар давомида унинг қаерда экани расман очиқланмаган.

Қурманбек Бакиев 2005 йилда содир бўлган “Лола инқилоби” натижасида ҳокимият тепасига келган. У биринчи президент Асқар Акаевнинг истеъфосидан сўнг мамлакатни бошқара бошлаган. 2010 йилнинг апрель ойида мамлакатда оммавий норозилик намойишлари бўлиб ўтган. Пойтахт Бишкекда намойишчилар ва ҳуқуқ-тартибот органлари ўртасида тўқнашувлар юз бериб, “Оқ уй” (президент қароргоҳи) олдида ўнлаб одамлар ҳалок бўлган. Қурманбек Бакиев мазкур ишда айбдор деб топилиб, сиртдан 30 йилга озодликдан маҳрум этилган. Ҳозирда у Беларусда истиқомат қилмоқда.