Қувилган Ташиев яна қайтадими?

Сиёсатнинг ёзилмаган, аммо қон билан битилган бир олтин қоидаси бор – бу майдонда абадий дўстлар бўлмайди, фақат абадий манфаатлар мавжуд. Бунга 20 йиллик ҳаётий ва сиёсий чиғириқлардан ўтганига қарамай, охирда айро тушган Қамчибек Ташиев ва Садир Жапаров тандемини яққол мисол бўла олади. Уларни  кўпчилик “ажралмас дўстлар” деб таърифлаган бўлса-да, тарихнинг ўзи бу каби иттифоқларнинг нақадар мўртлигини неча бор исботлаган.

Ҳокимиятни тор курсига ўхшатиш ҳам мумкин, унга икки киши баравар ўтира олмайди. Жапаров иқтидорга келгусигача ва ундан кейинги марҳалада унга ҳамроҳ, ҳамдард бўлган Ташиев энди Президентнинг мутлақ ваколатларига ҳам ҳамтовоқ бўлишни тусаган чоғи, Жапаров жаноблари ими-жимида қуролдош дўстининг думини тугди. Зотан Президент Ташиев билан муносабатлари сақланиб қолгани, бу уларнинг дўстлигига раҳна солмаслигини таъкидласада, Ташиев бирор марта бундай фикр билдирмади, аксинча, ўзини бир оғиз огоҳлантирмай ишдан олишганидан ёзғирди.

“ Мен буни кутмагандим. Қандай бўлмасин, биз Президент қарорига бўйсунамиз. Мен давлатимизга, халқимизга ва Президентимизга шараф билан хизмат қилдим ва бундан фахрланаман. Шахсий таркиб билан хайрлашиш имконияти берилмагани мени бироз хафа қилди”, деган собиқ раҳбар.

Хўш, нафақат Қирғизистоннинг давлат хавфсизлигини кафтида тутган, балки мамлакат сиёсий майдонининг энг қудратли ва муросасиз шахсларидан бири, баъзилар “миллат халоскори” деб билса, бошқалар популистликда айблайдиган, истаган одамини ишдан олиб, истаганини қамоққа ташлаган, чегара масаласида Ўзбекистонга аччиқ қилиб, тўнини тескари кийиб олган, тошкентлик “Салимбойвачча” ҳақидаги кескин фикрлари билан ўзбеклар орасида машҳур бўлган Қамчибек Қидиршаевич Ташиев аслида ким? 

Қишлоқи йигит сиёсатда

Жанубий чеккаси Фарғона водийсига туташган Жалолободнинг Барпи қишлоғида бундан 58 йил аввал оддий, меҳнаткаш оилада Қамчибек исмли фарзанд туғилади. У оилада 11 нафар фарзанддан бири эди. Ташиевнинг болалиги қишлоқнинг оғир меҳнат шароитларида ўтган. У ёшлигидан дала ишлари, чорвачилик ва жисмоний меҳнат билан чиниққан. Бу унинг характеридаги чидамлилик ва қатъиятлиликни шакллантирган.

1987 йилдан 1989 йилгача собиқ совет армиясида хизмат қилган Ташиев мутахассислиги бўйича муҳандис-технолог бўлса-да, унинг қонида сиёсий амбициялар жўш урарди. 2000 йилларнинг бошида Ташиевнинг куни туғди. 2005 йилдаги “Лола инқилоби” ва 2010 йилги апрель воқеалари Ташиевни ҳақиқий “темир мушт сиёсатининг устаси” сифатида шакллантирди. Йиллар давомида бир неча бор қамоққа олинган, қувғун қилинган, аммо ҳар сафар сиёсатга “Бумеранг” каби қайтиб келаверган.

Хусусан, 2005 йилда “Олға, Қирғизистон!” партиясидан парламент депутатлигига номзод сифатида кўрсатилган, 2007 йилда Фавқулодда вазиятлар вазири этиб тайинланган. 2009 йилда бош вазир Дониёр Усенов билан келишмовчиликлар сабаб истеъфога чиққан. 2010-2013 йилларда Жогорку Кенешнинг V чақириқ депутати бўлган.

Сиёсий курашлар ва қамоқ йиллари

2010 йилги Қирғизистон парламенти сайловларида ўз партияси муваффақият қозонганидан сўнг, 23 октябрь куни Ташиевнинг уйига босқин бўлади. Кейинчалик у “Al Jazeera” телеканалига берган интервьюсида Роза Отунбаева ҳукумати томонидан ўзига суиқасд бўлганини айтади.

“Улар уйга бандитлардек бостириб киришди... Ўйлашимча, уларнинг мақсади мени отиб ташлаш эди. Сайлов натижаларини бекор қилиб, фавқулодда ҳолат жорий қилмоқчи бўлган кучлар мени йўқ қилишга уринишди, деб ҳисоблайман. Мен аниқ биламан, бу ишларнинг ортида Миллий хавфсизлик хизмати турган эди”, деб баёнот беради. 

У ўша вақтдаги муваққат президент Роза Отунбаева ҳукуматида Миллий хавфсизлик давлат қўмитаси раҳбари бўлган Кенешбек Дуйшебаевни ўзига ҳужум қилишда айблайди. Дуйшебаев ва Роза Отунбаева барча айбловларни рад этишди.

2012 йил 3 октябрь куни Қумтор олтин конини миллийлаштириш бўйича митинг пайтида Қамчибек Ташиев намойишчилар, депутат Садир Жапаров ва вице-спикер Талант Мамитов билан биргаликда ҳукумат биносига киришга уринган. Ҳуқуқни муҳофаза қилиш органлари тартибсизликларни бостирган. Иштирокчилар ҳокимиятни куч билан эгаллаб олишга уриниш айблови билан судланган.

2013 йил август ойида Қирғизистон Олий суди Жапаров, Ташиев ва Мамитовни ҳукуматни зўрлик билан ағдаришга уринишда айбдор деб топди ва уларга бир йил-у беш ойлик қамоқ жазосини тайинлади. Судланувчилар жазо муддати тугагани сабабли суд залидан озод қилинди. Учаласи ҳам депутатлик мандатларидан маҳрум қилинди. Озод қилинганидан кейин Садир Жапаров тўрт йил чет элда яшайди ва 2017 йилда мамлакатга қайтганда яна ҳибсга олинади. 

2020 йилги намойишлар фонида ҳокимиятга қайтган Ташиев ва Жапаров Қирғизистон Олий суди томонидан оқланди.

Сиёсатга қайтиш

2020 йил 5 октябрда Қирғизистонда қуйи палата сайловлари натижалари эълон қилинганидан кейин оммавий норозилик намойишлари бошланди. Бу норозилик намойишлари тартибсизликларга ва парламент биносига бостириб киришга айланди. Хавфсизлик кучлари норозилик намойишларини тарқатиб юборганида мингга яқин одам жароҳат олди ва бир киши ҳалок бўлди. Намойишлардан сўнг аввал президент Сороонбай Жээнбековнинг истеъфоси, кейин ҳукумат алмашинуви, Қамчибек Ташиев дастаги билан Садир Жапаровнинг президент этиб сайланиши ва Қирғизистонда янги Конституция қабул қилиниши кузатилди.

Қамчибек Ташиев 2020 йил 16 октябрь куни МХДҚга раҳбарлик қила бошлади. Беш йил ичида қўмита мамлакатнинг асосий куч тузилмасига айланиши билан бирга, ўз таъсирини сезиларли даражада кенгайтирди. 

Шу билан бирга кўплаб давлат идораларида ички хавфсизлик бўлимлари кучайтирилди, МХДҚ собиқ ходимлари эса фуқаролик идораларида раҳбар лавозимларига тайинлана бошланди.   

Уюшган жиноятчиликка қарши курашдан тортиб, фоҳишаликка қарши кураш, озиқ-овқат хавфсизлиги,  тиббиёт, таълим, энергетикагача бўлган кенг сарҳадни Ташиев ўз қўлига олди. У раислик қилган йиғилишларда порахўр мулозимлар очиқчасига ҳибсга олинди. 

Расмий ваколатлар қонуний жиҳатдан деярли кенгайтирилмаган бўлса-да, амалда МХДҚ полиция, маҳаллий органлар ва ҳатто санитария хизматларига оид функцияларни амалга ошира бошлади ва бу ишлар кўпинча Ташиевнинг шахсий топшириғи билан бажарилган.

Коррупция можаролари

Қамчибек Ташиевнинг оиласи мамлакат жанубидаги ёқилғи бизнеси билан чамбарчас боғлиқ. Журналистик суриштирувларга кўра, Жалолобод нефтни қайта ишлаш заводи унинг қариндошлари номига расмийлаштирилган. Унинг 31 ёшли жияни Жалолободдаги йирик нефть заводига раҳбарлик қилади.

Журналист Болот Темировнинг суриштируви шуни кўрсатдики, Ташиевнинг қариндошларига тегишли воситачи компаниялар давлат заводининг маҳсулотларини экспорт қилиш орқали қисқа вақт ичида миллионлаб сом фойда кўрган. Шунингдек, унинг ўғли Таймурас ва бошқа қариндошлари Жалолободдаги давлат тендерларида ғолиб чиққани аниқланган.

Ташиев ҳокимиятга келгач, унинг кўплаб қариндошлари юқори лавозимларга тайинланди:

Абсаттар Сиргабаев (тутинган ўғли) – Жалолобод вилоятидаги президент вакили;

Шайирбек Ташиев (укаси) – парламент депутати;

Таймурас Ташиев (ўғли) – Жалолобод шаҳар кенгаши депутати;

Бошқа жиянлари ва яқинлари прокуратура, божхона ва давлат компанияларида раҳбарлик лавозимларини эгаллаган.

Эркин фикрга қарши босим

Журналистик суриштирувлардан сўнг Қирғизистон ОАВларига ҳужумлар бошланди. Журналистлар ҳибсга олинди, уларга нисбатан босимлар ортди. Садир Жапаров ва Қамчибек Ташиев ҳокимиятга келганидан бери Қирғизистон “Чегара билмас мухбирлар” ташкилотининг сўз эркинлиги рейтингида 50 поғонага пастлади.

МХДҚнинг таъсири ортиб бориши билан фуқаролик секторига босим ҳам кучайган. Журналистлар, ҳуқуқ фаоллари ва активистлар тез-тез чақиртиришлар, ҳибслар ва тинтувлар ҳақида гапирган. Оддий фуқаролар, айниқса ижтимоий тармоқларда фаол бўлганлар ҳам бу босимни сезган. Масалан, Instagram’даги машҳур “Бабский блог” администратори 22:00 дан кейин кафе ва ресторанларнинг ишлашига қўйилган чекловлар сабабли бизнесга зарар етиши ҳақида жойлаган ҳикояси учун МХДҚга чақиртирилган. МХДҚнинг эътиборига тушмаслик учун тадбиркорлар, сиёсатчилар ва жамият фаоллари яъни оммавий ва сиёсий ҳаётда фаол бўлганлар ўзларини камроқ намоён қилишга мажбур бўлган.

Шу мисоллардан кўриниб турибдики, МХДҚ 5 йил ичида у жиноятчилик ва коррупцияга қарши курашдан тортиб бозор нархлари ва биринчи синфларга ўқувчи қабул қилишни амалга оширувчи оддий махсус хизматдан универсал органига айланган.

Абдулла Ариповдан аразлаган генерал

Ўтган йили Қирғизистон Президенти Садир Жапаровнинг 5 йиллик фаолиятига бағишланган фильмда Қамчибек Ташиев Ўзбекистон билан чегара масалаларини ҳал қилиш жараёнлари қандай кечгани ҳақида гапириб берган. 

Унинг таъкидлашича, жараён осон ўтмаган, баъзан музокаралар кескин тус олган. Қамчибек Ташиев Ўзбекистон Бош вазири Абдулла Арипов билан тортишиб, ўзаро уришиб қолган пайтлари ҳам бўлган.

“Бир вақт Арипов билан келиша олмай қолдик. Яхши-ёмон гаплар ўтиб, уришиб кетдик. Уям кетди, мен ҳам кетдим. Кейин у кел, гаплашайлик деди, мен эса йўқ, гаплашмайман, деб туриб олдим”, дейди у.

Ташиевнинг таъкидлашича, шу ҳолатдан кейин икки давлат президентларининг шахсий аралашувисиз музокаралар тўхтаб қолиши мумкин эди. Ташиев бу кечинмалар ҳақида гапирар экан, чегара масаласини ҳал этишда раҳбарлар қатъияти, сиёсий ирода ва ўзаро ишонч ҳал қилувчи омил бўлганини қайд этган.

“Президентимиз ўртага тушди. Икки давлат раҳбарлари қўйинглар, уришманглар, талашманглар, ўтиринглар деб муросага чақирди. Шундан кейин музокаралар қайтадан тикланди”, дея қўшимча қилди у.

Ташиевни чўчитган “Салимбойвачча”   

2025 йилда Қирғизистонда бутун бўғинни назоратига олган Миллий хавфсизлик давлат қўмитаси раиси Қамчибек Ташиев халқ орасида “Салимбойвачча” номи билан машҳур Салим Абдувалиев қўшни мамлакатнинг жанубини бутунлай назорат қилганини айтиб чиққани ўзбекистонликлар учун кутилмаган хабар бўлди ва бу яшин тезлигида атрофга тарқалди.

“Мамлакатимиз бошқа давлатлардаги уюшган жиноятчиликнинг раҳбарлари остида эгила бошлаганди. Мана, Ўзбекистондаги “Салимбойвачча”. У мамлакатимиз жанубини тўлиқ назорат қилган. Жанубда барча уюшган жиноятчилик раҳбарлари, барча йирик тадбиркорлар ва ҳатто баъзи сиёсий арбоблар, парламент аъзолари унинг олдига бориб, у билан гаплашган ва у нима деса, шуни қилишган. Тушуняпсизми? Энди бу содир бўлмайди. Мамлакатимиз мустақил ривожланади. Уюшган жиноятчилик бўлмайди”, деган Ташиев.

Таълим ва фан вазири ўринбосарлари, олий ўқув юртлари ректорлари, касб-ҳунар лицей ва коллежлари директорлари билан учрашувда у бир неча йил олдин Қирғизистонда уюшган жиноятчилик жуда жиддий бўлгани, бутун мамлакат бўйлаб “қонундаги ўғрилар“ ва “положенец” назоратчилар ҳокимиятни эгаллаб олганини айтган ва  халқаро жиноий доираларда “Коля қирғиз” номи билан танилган криминал авторитет Қамчи Кўлбоев 2023 йилда ҳибсга олиниши чоғида ўлдирилганининг сабабини тушунтирган.

“Уларда давлат тизимига ўхшаш тизим бор эди: уларда “қонундаги ўғри” бўлган “президент” бор эди, қолган вилоятлар, туманлар ва шаҳарлар ҳам шундай эди. Назоратчилар ва “смотряиши”лар тадбиркорлардан ҳам, ҳаммадан ҳам пул йиғишди. Уларнинг ўзига хос, жуда кучли тузилиши бор эди. Чоралар кўришга мажбур бўлдик. Сизларга кўпроқ маълумот бераман, токи ишончингиз комил бўлсин, азиз таълим соҳаси ходимлари. Мен ҳақиқатни айтмоқчиман: “қонундаги ўғрилар”ни йўқ қилиш учун қарор қабул қилишим керак эди. Давлат манфаати учун мен буни қабул қилдим ва биз уни йўқ қилдик. Кейинчалик биз унинг шериклари ва уюшган жиноятчиликнинг бошқа аъзоларини йўқ қилдик. Бугун мамлакат бу тартибсизликдан озод. Мамлакатда уюшган жиноятчилик мавжуд эмас. Бу Марказий Осиёда ва эҳтимол нафақат Марказий Осиёда, балки бутун собиқ Совет давлатлари орасида ҳозирда уюшган жиноятчиликка учрамаган ягона давлатдир”, деган Ташиев.

Бу воқеалар фонида Абдувалиев билан боғлиқ ҳодисаларга қирғизистонлик депутатнинг аралашуви ҳам барчанинг диққатини ўзига қаратди.

2025 йилда Қирғизистонлик депутат Эмил Жамғирчиев қирғиз-ўзбек чегарасини ноқонуний кесиб ўтишда айбланди. Депутат Жамғирчиевни жиноий жавобгарликка тортиш тўғрисидаги Бош прокуратура сўровини кўриб чиқиш учун тузилган депутатлик комиссиясига депутат Алишер Эрбоев бошчилик қилди.

Маълумотларга кўра, Жамғирчиев ўзбекистонлик “Салимбойвачча” номи билан танилган Салим Абдувалиевдан ёрдам сўраган, у билан яширин учрашув ўтказиш учун 2022 йил декабрь ойида чегарани ноқонуний кесиб ўтиб, Тошкентга келган.

Миллий хавфсизлик давлат қўмитаси томонидан Жиноят кодексининг 378-моддаси (Давлат чегарасини ноқонуний кесиб ўтиш) билан жиноят иши қўзғатилган ва Жамғирчиев қидирувга берилган. Ўзбекистон суди ҳам уни ҳибсга олиш учун қарор чиқарган.

Ўша пайтдаги Қирғизистон Миллий хавфсизлик давлат қўмитаси раҳбари Қамчибек Ташиевнинг айтишича, суриштирувларга кўра, Жамғирчиевнинг Ўзбекистонда нима ишлар қилгани тўлиқ аниқланган.

“Жамғирчиевни ҳеч ким махсус таъқиб қилмаган. Агар у чегарани қонуний равишда кесиб ўтган бўлса, унга ким нима дерди? Чегарани бемалол кесиб ўтиб, хоҳлаган одам билан учрашиб, қайтиб кетарди. Лекин бу ерда қонун бузилиши бор ва биз бунга муносабат билдиришимиз керак. Бу шунчаки процедура”, деганди Миллий хавфсизлик давлат қўмитаси собиқ раҳбари.

Қирғизистон депутатлари ҳам Эмил Жамғирчиевни жиноий жавобгарликка тортишни маъқуллади. Депутатлар йиғилишида 81 нафар депутат овоз беришда қатнашди. Депутат Эмил Жамғирчиевни жиноий жавобгарликка тортиш учун 69 депутат овоз берди. 

Депутатнинг Абдувалиев билан кўришишга урингани ортидан яна “Салимбойвачча” Қирғизистонни назорат қилганми, деган гап-сўзлар янгради. 10 январь уни Қирғизистон Жогорку Кенешининг йиғилишида Қамчибек Ташиев депутат Эмил Жамғирчиевнинг Салим Абдувалиевга берган мактубини ўқиб эшиттирди.

“Ушбу хат 10 саҳифадан иборат. Уни у ўз қўли билан ёзган. Жамғирчиев Абдувалиевдан ёрдам сўраган. Хатда у ҳокимиятга туҳмат қилиб, уларга нисбатан чора кўришни сўраган. Бу қандай аҳмоқлик?” деган у.

Унинг “Салимбой”га ёзган хатида айтилишича, Қамчибек Ташиев ундан 180 минг доллар ундирган. Ташиевга кўра эса 2 нафар йигит Жамғирчиевнинг отаси билан учрашиб, Қамчибек Ташиевга пул кераклигини айтишган. Улар Эмил Жамғирчиевнинг отасидан 180 минг доллар олиб кетишган. Кейинчалик улар ушланиб, отасига 180 минг доллар қайтариб берилган.

Аммо депутатнинг сўраган ёрдами фақатгина пул масаласида бўлмаган. У “Салимбойвачча”дан Қирғизистонда тартиб ўрнатишни илтимос қилган.

“Ҳурматли Салимбой ака, сиз бутун Марказий Осиёни назорат қиласиз, сизга ҳамма итоат қилади. Бизнинг Президентларимиз Акаев, Бакиев, Отунбаева, Атамбаев, Жеенбеков, Жапаровлар президентликдан олдин доим сиздан рухсат сўрашган. Мен ҳам буларнинг барчасини билиб туриб, сиздан ёрдам сўрайман”, дейди депутат ўз хатида.

Бунга жавобан эса Ташиев ҳеч бир президент Абдувалиевнинг дуосини олмаганини айтди.

“Бу қандай шармандалик? Бу бутун мамлакат учун шармандалик. Ҳеч бир президент жиноятчининг дуосини олмаган. У менга нисбатан чора кўришни сўраган. Хат борлигини Жамғирчиевнинг ўзи ҳам тан олган. Тасаввур қилинг, депутатлар орасида шундай одамлар бор”, дейди Ташиев.

Аммо унга жавобан Абдувалиев, эътибор беринг, Қирғизистоннинг ишига аралаша олмаслигини айтган. Бундан хабар топган қирғизистонлик терговчилар ва тезкор ходимлар ўзбекистонлик ҳамкасблари билан бирга Салим Абдувалиевни сўроққа тутган. Ташиевнинг айтишича, Абдувалиев Жамғирчиев келганини, ундан Қирғизистонда тартиб ўрнатишни сўраганини билдирган. Аммо Абдувалиев Қирғизистон ишига аралаша олмаслигини айтган.

“Бундан ташқари, у Жамғирчиев “Салимбойвачча”нинг ёрдамчисига хиёнат қилганини айтади. Ёрдамчи ҳам гувоҳлик берган. Жамғирчиев бир неча кун унинг меҳмонхонасида яшаб, пул тўламай қочиб кетган”, деган Ташиев.

Маълумотларга кўра, депутат 2025 йил 9 январь куни парламентда матбуот анжумани ўтказиши керак бўлган, бироқ унда қатнашмаган. Кейинроқ парламентга ҳуқуқ-тартибот идоралари вакиллари келган. Депутат шундан сўнг ғойиб бўлган. У бинонинг иккинчи қаватидан сакраб қочган ва қайтиб келмаган. Январь ойида Қирғизистон Жогорку Кенеши депутати Эмил Жамғирчиев қамоққа олинди. Эмил Жамғирчиевни қамоққа олиш ҳақидаги қарор Первомайский туман суди томонидан қабул қилинган. 

2025 йил 2 февраль куни эса Қирғизистон Марказий сайлов комиссияси Жогорку Кенеш депутати Эмил Жамғирчиевнинг ваколатларини муддатидан олдин тугатиш тўғрисида қарор қабул қилди.

2025 йилнинг август ойига келиб эса ўшанда қамоқда сақланаётган Салим Абдувалиевга Қирғизистон қидирув эълон қилди ва шунингдек, Қирғизистонда  Абдувалиевга алоқадор шахсларни “тозалаш” бошланди. 

Тезкор-қидирув тадбирлари доирасида Ўзбекистоннинг йирик тадбиркорларидан бири Салим Қирғизбоевич Абдувалиев томонидан “Биродарлар давраси” халқаро жиноий гуруҳи таркибига кирган Қамчибек Асанбек (“Коля Қирғиз”) уюшган жиноий гуруҳи фаолиятини молиялаштириш фактлари аниқланган.

Абдувалиевга алоқадор яна бир қирғиз депутати 2024 йилнинг сентябрида аниқланди.

Қирғизистон Миллий хавфсизлик давлат қўмитасида Сузоқ туманида яшовчи фуқаро – қишлоқ фуқаролар йиғинининг собиқ депутати билан профилактик суҳбат ўтказилиб, уюшган жиноий гуруҳ мафкурасидан воз кечиш мажбурияти олинган. Аввалроқ, унинг ижтимоий тармоқларда “Салимбойвачча” билан тушган сурати пайдо бўлган эди.

Тушунтириш ишларидан сўнг профилактик суҳбат ўтказилган шахс жиноий алоқадан воз кечган ва Қирғизистон Республикасининг режалаштирилган сиёсий йўналишини қўллаб-қувватлашини маълум қилган.

“Мени кутинг, мен қайтаман”

Қамчибек Ташиев Қирғизистоннинг ҳақиқий қиёфаси бўлишга уринди. Бугунга келиб эса сиёсий бўлиниш ва кескинлашувлар фонида барча ваколатларидан маҳрум қилинди ва мамлакатни тарк этди. Садир Жапаров бўлса, Ташиевдан осонликча воз кечиб, бири кетса, ортида 7 млндан ортиқ дўсти борлигини ва “Ташиев кетди, энди нима бўлади?” деган саволларга ўрин йўқлигини таъкидлади.

“Ҳеч нарса бўлмайди. Бу масалани фожиа даражасига кўтаришнинг ҳожати йўқ. Олдингисидан ҳам яхшироқ бўлади. Ҳаёт тўхтамайди. Агар бир дўст кетиб қолса, менинг ортимда 7 миллиондан ортиқ дўстим бор. Менинг учун энг қадрли нарса – халқимиз ва азиз давлатимиз”, дейди Президент.

Сиёсат – бу шахмат тахтаси. Ташиев эса бу тахтадаги “фарзин” вазифасини бажарди. Шахматда “шоҳ”ни асраш учун ҳар қандай фигура қурбон қилиниши мумкин. Дўстлик тугаган жойда – тирик қолиш инстинкти бошланади.

Ташиевнинг табиатидан келиб чиқсак, бир нарса аниқ: у яна қайтади, фақат қачон ва қандай бўлиши номаълум. У – “сиёсий феникс”. Чунки афсонавий Феникс қуши ўз оловида ёниб кул бўлади ва яна ўша кулдан қайта туғилади. Қамчибек Ташиевнинг сиёсий тақдири ҳам айнан шу символга мос.

У бир неча бор “енгилди”, деб ҳисобланганида ҳам қайтиб кела олган. Унинг “яна қайтиши” фақат вақт масаласи. У қўпол, тезкор, ҳиссиётли, лекин шу билан бирга натижага йўналтирилган сиёсатчи. Унинг кейинги манзили президентлик креслосими ёки йўқ, буни вақт кўрсатади.