Қрим Россияда қолади ва Зеленский ҳам буни тушунади – Трамп

АҚШ Президенти Дональд Трамп Россия ва Украина ўртасидаги уруш тугаганидан кейин ҳам Қрим Россиянинг назорати остида қолишини айтди. Бу ҳақда у “Time” журналига берган интервьюсида сўз очди.

“Биз Қрим ҳақида гапиришга мажбурмиз, чунки уни доим тилга олишади. Қрим Россияда қолади ва Украина Президенти Владимир Зеленский ҳам буни тушунади. Барчага аёнки, Қрим узоқ вақт Россия билан бирга бўлган”, деди АҚШ Президенти.

Шунингдек, Трамп ҳали ҳам Россия Президенти Владимир Путин ва Украина Президенти Владимир Зеленский билан тинчлик келишувига эришиш мумкинлигига ишонишини таъкидлаган.

“Бизнинг Москва билан жуда яхши музокараларимиз бўлди ва биз келишувга эришишга жуда яқин турибмиз”, деди у.

“Time” журналисти унга президентликнинг биринчи кунидаёқ Россия-Украина урушини тугатиш ҳақидаги ваъдасини эслатди. Трамп эса бунга жавоб берди.

“Мен буни образли маънода ва фикримни кескинроқ ифода этиш учун бўрттириб айтдим… Албатта, одамлар, буни ҳазил сифатида қабул қилган. Лекин мен шуни ҳам айтмоқчиманки, бу урушга нуқта қўйилади”, дейди АҚШ етакчиси.

Украинанинг НАТОга аъзо бўлиш истаги ҳақида гапирар экан, Трамп бу режанинг амалга ошишини имконсизга яқин деб баҳолаган.

“Менимча, урушнинг бошланишига айнан шу сабаб бўлган – украиналиклар НАТОга кириш ҳақида гапира бошлаганида. Агар улар бу масалани кўтармаганида, уруш бошланмаслиги эҳтимоли анча юқори бўларди”, деди Трамп.

Эслатиб ўтамиз, аввалроқ Ғарб оммавий ахборот воситалари ўз манбаларига таяниб, АҚШнинг “тинчлик режаси” доирасида берилган таклифлар Қримни Россия ҳудуди сифатида тан олиш ва жорий фронт чизиғини музлатишни ўз ичига олишини ёзган эди.

Кейин эса Украина Президенти Владимир Зеленский Украина Қримнинг босиб олинишини юридик жиҳатдан тан олмаслигини, бу мамлакат Конституциясига зидлиги ва Украина халқининг ҳудуди экани ҳақида баёнот билан чиқди. Украина Президенти ўз публикациясига Трампнинг биринчи маъмуриятидаги давлат котиби Майк Помпео томонидан 2018 йилда имзоланган Қрим декларацияси – Россиянинг Қримни аннексия қилишини тан олмаслик ҳақидаги баёнотни ҳам илова қилди.