Украина Қримнинг босиб олинишини тан олмайди – Зеленский

Украина, АҚШ, Буюк Британия, Франция ва Германия вакиллари кеча, 23 апрель куни Лондонда йиғилиш ўтказди ва ўз фикрларини билдирди, бир-бирларининг позицияларига ҳурмат билан муносабатда бўлди. Бу ҳақда Украина Президенти Зеленский Х’даги саҳифасида ёзди.

“Муҳими шундаки, ҳар бир томон фақатгина иштирокчи эмас, балки муҳим ҳисса қўшди. Америка томони ўз қарашларини баён этди. Украина ва бошқа европаликлар ўз таклифларини тақдим этди. Ва биз умид қиламизки, айнан шундай ҳамкорликдаги иш ҳақиқий тинчликка олиб келади. Биз шерикларимизга миннатдорлик билдирамиз. Украина доимо ўз Конституциясига мувофиқ ҳаракат қилади ва биз тўлиқ ишончдамизки, бизнинг шерикларимиз, хусусан, АҚШ унинг қатъий қарорларига мувофиқ ҳаракат қилади”, деди Зеленский ижтимоий тармоқдаги Х саҳифасида.

Киевдаги брифингда Зеленский Украина ҳеч қандай ҳудудий имтиёзларга рози бўлмаслигини ва Лондондаги украин делегацияси фақат ўт очишни тўлиқ тўхтатиш шартларини муҳокама қилишини маълум қилди, шундан сўнг Россия билан музокаралар олиб бориш мумкин бўлади.

“Украина Қримнинг босиб олинишини юридик жиҳатдан тан олмайди, бу ерда гап бўлиши мумкин эмас. Бу бизнинг Конституциямизга зид. Бу бизнинг ҳудудимиз, Украина халқининг ҳудуди”, дея таъкидлади у.

Украина Президенти ўз публикациясига Трампнинг биринчи маъмуриятидаги давлат котиби Майк Помпео томонидан 2018 йилда имзоланган Қрим декларацияси – Россиянинг Қримни аннексия қилишини тан олмаслик ҳақидаги баёнотни ҳам илова қилди.

АҚШ Президенти Дональд Трамп Украина раҳбари Владимир Зеленскийнинг Киев Қримнинг босиб олинишини юридик жиҳатдан тан олмаслиги ҳақидаги баёнотини танқид қилди. Truth Social ижтимоий тармоғидаги ўз постида Трамп бу баёнот “Россия билан тинчлик музокараларига жиддий зарар етказиши”ни, чунки Қрим “кўп йиллар олдин”, яъни Барак Обама президент бўлган пайтда йўқотилгани ва “музокаралар мавзуси эмас”лигини ёзди.

“Ҳеч ким Зеленскийдан Қримни Россия ҳудуди сифатида тан олишни сўраётгани йўқ, лекин агар у Қримни хоҳласа, нега 11 йил олдин, у Россияга бир ўқсиз берилганда курашмаган? Айнан шундай қўзғатувчи баёнотлар урушни бартараф этишни қийинлаштиради”, деди Трамп.

Зеленский Трампга жавобан, Трампнинг биринчи маъмурияти пайтидаги давлат котиби Майк Помпео томонидан имзоланган Қрим декларациясини эслатиб ўтди, унда Қримнинг ноқонуний аннексия қилингани таъкидланган.

Аввалроқ ғарб оммавий ахборот воситалари манбаларига таяниб ёзишича, АҚШнинг “тинчлик режаси” доирасида берилган таклифлар Қримни Россия ҳудуди сифатида тан олиш ва жорий фронт чизиғини музлатишни ўз ичига олган.