Қозоғистонлик журналистлар Россиянинг “қора рўйхати”га тушди

Қозоғистонлик журналистлар Ирина Медникова, Лукпан Аҳмадёров ва Раул Упоровларга Россияга киришга рухсат берилмади. Бу ҳақда улар ўзларининг Facebook саҳифасида маълум қилди.

Медниковага кўра, у ҳеч қандай муаммосиз чипта сотиб олган ва аэропортга борган. Бироқ рўйхатдан ўтиш столида унга бундан кейин унинг Россияга учиши тақиқлангани маълум қилинган.

“Аэропорт ходимлари бу ҳолат биринчиси эмаслигини, шунга ўхшаш бир неча ҳолатлар бўлганини айтишди. Ҳатто, шунчалик кўпайиб кетган-ки, Россия томони барча кириши тақиқланган шахслар рўйхатини эълон қиладиган веб-сайт ишлаб чиқаётган эмиш”, деб ёзади журналист.

Журналист Лукпан Аҳмадёровнинг сўзларига кўра, у ва ҳамкасби Рауль Упоровга Россияга 50 йилга кириш тақиқланган. Бу ҳақда улар собиқ россиялик ҳамкасбларидан билиб олган.

“Бу тақиқнинг асосида ўша “чет эллик агентлар” рўйхати ётган бўлиши мумкинми? Уни бизга ҳеч қандай таъсири бўлмайди, деб ишонтиришган эди, лекин ундан ҳам сиёсий усул сифатида жуда яхши фойдаланишди-ку. Энди бу рўйхат Россиянинг таъсир доирасида трансчегаравий тус оладими?” дея савол қўйган Медникова.

Эслатиб ўтамиз, аввалроқ Қозоғистон бир қатор россиялик депутатларнинг мамлакатга киришини тақиқлагани хабар қилинганди. Уларнинг орасида  Россия МДҲ мамлакатлари институти ходими ва тарихчи Андрей Грозин, Давлат Думаси депутатлари Евгений Федоров, Вячеслав Никонов ва Петр Толстой, шунингдек, Константин Затулин каби шахслар бор.

Жалолиддин Раҳмонов