Қозоғистонга транспорт киришига чеклов жорий этилди

Энди битта транспорт воситаси Қозоғистонга бир сутка ичида фақат бир марта кириши мумкин. Бу ҳақда бугун, 7 июль куни ҳукуматда ўтказилган брифингда Энергетика вазири ўринбосари Қайирхон Тутқишбоев маълум қилди.

Қайд этилишича, Қозоғистонда ёнилғи-мойлаш материалларининг чегара орқали ноқонуний олиб чиқиб кетилишининг олдини олиш бўйича комплекс чора-тадбирлар амал қилмоқда. Вазир ўринбосарининг сўзларига кўра, амалдаги чоралардан бири қўшни давлатлардан транспорт воситаларининг киришини чеклаш бўлган.

“Ҳозирда қўшни давлатлардан юк ва енгил транспорт воситалари Қозоғистон ҳудудига суткасига бир мартадан кўп бўлмаган миқдорда кириши мумкинлиги ҳақидаги чора амал қилмоқда”, дейди Қайирхон Тутқишбоев.

Унинг қўшимча қилишича, ёнилғининг “кулранг” экспортига қарши курашишга алоҳида эътибор қаратилмоқда.

“Ҳозирги вақтда асосий иш ёнилғини яширинча олиб чиқиб кетиш учун фойдаланиладиган қўшимча ёнилғи баклари бўлган автомобилларни аниқлашга қаратилган. Бу иш билан Ички ишлар вазирлиги, Молиявий мониторинг агентлиги, Чегара хизмати ва божхона органлари ҳамкорликда шуғулланмоқда”, дейди Тутқишбоев.

Мулозимнинг айтишича, чегараолди ҳудудларда ёнилғини ноқонуний олиб чиқиб кетишга уринаётган қоидабузарлар мунтазам равишда аниқланмоқда.

“Бугунги кунда Қозоғистондан ёнилғи-мойлаш материалларининг яширинча олиб чиқиб кетилишининг олдини олишга қаратилган чора-тадбирлар комплекси амал қилмоқда”, дейди вазир ўринбосари.

Эслатиб ўтамиз, аввалроқ бензин танқислиги фонида Қозоғистонда икки сутка ичида мамлакатдан ёнилғи олиб чиқиб кетишга бўлган 60 дан ортиқ уринишнинг олди олингани ҳақида хабар берилган эди.