Қозоғистонда Нурсултон Назарбоевнинг қизи қидирилмоқда

Қозоғистон журналистлари Биринчи Президент – Элбоши Нурсултон Назарбоевнинг қизини қидирмоқда. “Orda.kz” нашри Нурсултон Назарбоевнинг қизи Дариға Назарбоевани мамлакат парламенти Қуйи палатаси йиғилишида ҳам кўриниш бермаганини айтмоқда.

Қайд этилишича, Қуйи палата йиғилишида иштирок этган депутат бугун, 11 январь куни Дариға Назарбоевани кўрмаганини, лекин у ерда бор-йўқлигига ишончи комил эмаслигини айтган.

“Мен уни кўрмадим. Чунки депутатлардан ким келиб, ким келмаганини кўриш мақсадим йўқ эди. Одатда, агар депутатлар ялпи мажлисга келмаса, бунга сабаб ё соғлиғи ёки хизмат сафари билан боғлиқ бўлиши мумкин”, деган парламент вакили.

Нашрга кўра, ҳукмрон “Нур Отан” партияси Матбуот хизмати Дариға Назарбоеванинг қаердалигини аниқлашга ваъда берган, бироқ ҳозирча ҳеч қандай қўшимча қилмаган.

Эслатиб ўтамиз, Қозоғистонда жорий йилнинг илк кунларидан бошланган намойишлардан сўнг, Элбоши Нурсултон Назарбоевнинг қаердалиги номаълум эди. Баъзи ОАВлар уни оила-аъзолари билан бирга Дубайга кетганини ҳам тахмин қилди. Аммо орадан бироз вақт ўтиб, Элбошининг Матбуот котиби Айдос Укибай Назарбоевнинг пойтахт Нур-Султонда эканини маълум қилди.

Аввалроқ, Нурсултон Назарбоевнинг кенжа қизи Алия Назарбоева Буюк Британия фуқаролигини олиш мақсадида мамлакатдан 300 миллион доллар олиб чиқиб кетган ва Лондондан уй сотиб олгани ҳақида хабар берган эдик.