Қозоғистонда мусобақага кетаётган футболчи болалар ҳалокатга учради. Қурбон бор

Бугун, 19 апрель куни Қозоғистоннинг Павлодар шаҳрида мактаб ўқувчиларидан иборат футбол жамоасини олиб кетаётган микроавтобус ағдарилиб кетди. Воқеа оқибатида бир киши ҳалок бўлди. Бу ҳақда “Kazinform” хабар берди.

Маълум қилинишича, Mercedes микроавтобуси “Остона-Ерейментау-Шидертми” трассасида аварияга учраган. Улар Остона шаҳрига мусобақа учун йўлга чиққан. Микроавтобус ичида 16 бола ва мураббий бўлган. Бахтсиз ҳодиса оқибатида мураббий воқеа жойида ҳалок бўлган. 

“Болалар тиббий муассасага олиб кетилган, улар шифокор назорати остида”, дейилади хабарда.

Полиция маълумотларига кўра, хусусий спорт мактаби полицияга мусобақага саёҳат ҳақида хабар бермаган ва ёрдам сўрамаган, шунинг учун микроавтобус полиция томонидан бошқарилмаган. 

Павлодар ҳокимининг матбуот хизмати томонидан хабар берилишича, воқеа жойига вилоят Жисмоний тарбия ва спорт бошқармаси ва ҳуқуқ-тартибот идоралари вакиллари борган.

Шифокорларнинг маълум қилишича, микроавтобус билан боғлиқ бахтсиз ҳодисада 7 бола жароҳат олган ва Ерейментау вилоят касалхонасига олиб кетилган. Улардан бири интенсив терапияда.

Эслатиб ўтамиз, аввалроқ АҚШнинг Жанубий Каролина штатида мактаб автобуси ағдарилиб кетган ва оқибатда бир киши ҳалок бўлганди. Қолаверса, 18 киши жароҳат олганди.