Қозоғистонда Қурултойга сайловлар санаси эълон қилинди

Қозоғистоннинг янги бир палатали парламенти – Қурултойга сайловлар жорий йилнинг 23 август кунига белгиланди. Бу ҳақдаги тегишли фармонни бугун, 1 июль куни мамлакат Президенти Қосим-Жомарт Тўқаев имзолади.

Қайд этилишича, бугун, 1 июлдан Қозоғистонда жорий йил 15 март куни бўлиб ўтган республика референдумида қабул қилинган янги Конституция расман кучга кирган. Натижада бугундан бошлаб парламентнинг ҳар икки палати – Мажлис ва Сенат ўз фаолиятини тўхтатган. Шу сабабли бир ой муддат ичида Президент янги бир палатали парламент – Қурултойга сайловларни эълон қилиши, уларни эса икки ой ичида ўтказиши керак эди.

Тўқаев парламент ислоҳоти ҳақида 2025 йил сентябрь ойида Қозоғистон халқига йўллаган Мурожаатномасида эълон қилган эди. Ўшанда парламент бир палатали бўлиши, Сенат ва Мажлис эса тугатилиши маълум қилинганди. Конституцияга қўшимча ўзгартиришлар тайёрлаши керак бўлган ишчи гуруҳи тузилди. 

15 март куни бўлиб ўтган референдумда овоз берган фуқароларнинг 87,15 фоизи ушбу ўзгартиришларни қўллаб-қувватлади.

Эслатиб ўтамиз, 29 июнь куни Қозоғистоннинг саккизинчи чақириқ депутатларидан иборат икки палатали парламенти расман ўз фаолиятини якунлагани ҳақида хабар берилган эди.