Қозоғистон Европа билан ҳамкорликни кучайтиришга келишди

Қозоғистон Президенти Қосим-Жомарт Тўқаев ва Европа Иттифоқи етакчилари Брюсселда ўтказилган музокаралар якунида қўшма баёнот қабул қилди. Унда Қозоғистон ва Европа Иттифоқи ўртасида стратегик ҳамкорликнинг янги босқичи бошлангани айтилган.

Қозоғистон Президенти Қосим-Жомарт Тўқаев Брюсселда Европа Кенгаши раҳбари Антониу Кошта ва Европа Комиссияси раҳбари Урсула фон дер Ляйен билан музокаралар ўтказди. Томонлар Қозоғистон ва Европа Иттифоқи ўртасидаги ҳамкорликни янада ривожлантириш масалаларини муҳокама қилди.

Тўқаевнинг айтишича, Қозоғистон ва ЕИ ўртасидаги муносабатлар ҳамкорлик тарихидаги энг юқори даражага чиққан. Унинг сўзларига кўра, томонлар ўзаро ишонч ва ҳурматга асосланган стратегик алоқаларни янада кенгайтиришни мақсад қилган.

Брюсселдаги учрашувда имзоланган келишув ва меморандумлар томонларнинг ҳамкорликни мустаҳкамлашга интилишини тасдиқлайди. Тўқаев музокаралар натижалари икки томонлама алоқаларда янги саҳифа очишини таъкидлаган.

У Қозоғистон Марказий Осиё давлатлари ичида Европа Иттифоқи билан кенгайтирилган шериклик ва ҳамкорлик тўғрисидаги битимни имзолаган ва ратификация қилган биринчи давлат эканини эслатган. Унинг сўзларига кўра, томонлар ўртасида юқори даражадаги мунтазам сиёсий мулоқот йўлга қўйилган.

Музокаралар якунида Қосим-Жомарт Тўқаев, Антониу Кошта ва Урсула фон дер Ляйен қўшма баёнот қабул қилиб, ҳамкорликни чуқурлаштиришга тайёр эканини билдирган. Урсула фон дер Ляйеннинг айтишича, ушбу келишув имзоланганидан бери ўтган 10 йил ичида Қозоғистон ва ЕИ ўртасидаги савдо ҳажми икки баробардан кўпроқ ошган.

Томонлар инвестиция муҳитини яхшилаш, шунингдек энергетика, транспорт, рақамлаштириш ва янги технологиялар каби стратегик соҳаларда ҳамкорликни кучайтиришга келишиб олган. Улар Транскаспий халқаро транспорт йўлагининг аҳамиятини алоҳида таъкидлаб, глобал “Global Gateway” ташаббуси доирасида ҳамкорликни кенгайтиришни қўллаб-қувватлаган.

Шунингдек, томонлар авиация бўйича келишув ва виза тартибларини енгиллаштириш бўйича музокараларнинг якунланишини ижобий баҳолаган. Бу ҳужжатлар Қозоғистон ва ЕИ фуқаролари ўртасидаги алоқаларни янада кучайтириши кутилмоқда.