Қозоғистон Осиё ўйинларига мезбонлик қилади

Қозоғистоннинг жанубий пойтахти Олмаота 2029 йилги Қишки Осиё ўйинларига мезбонлик қилади. Бу ҳақда Осиё Олимпия Кенгашига (ООК) таяниб, “Xinhua” нашри хабар бермоқда.

Маълумотларга кўра, Осиё Олимпия Кенгаши мезбон шаҳарни расман тасдиқлаган. Қайд этилишича, мезбон шаҳар билан шартнома жорий йилнинг 5 февраль куни Италиянинг Милан шаҳрида расман имзоланиши кутилмоқда.

Маълумот учун, дастлаб 2029 йилги Қишки Осиё ўйинларини Саудия Арабистонида ўтказиш режалаштирилган эди. Бироқ, январь ойида Саудия Арабистони Олимпия ва Паралимпия қўмиталари ҳамда OОК қўшма баёнотида мусобақа номаълум муддатга қолдирилгани эълон қилинган эди.

Маълумот учун, сўнгги Қишки Осиё ўйинлари 2025 йилда Хитойнинг Харбин шаҳрида бўлиб ўтган.

Эслатиб ўтамиз, аввалроқ қозоғистонлик теннисчи Елена Рибакина Австралия очиқ чемпионати аёллар ўртасидаги яккалик баҳслари финалида дунёнинг биринчи рақамли теннисчиси беларуслик Арина Соболенкони мағлуб этиб, 2026 йилги илк “Катта дубулға” чемпионлигини қўлга киритган эди.