Qozog‘iston aholisi ham ko‘paydi

north_east

O‘zbekiston aholisi 38 milliondan oshdi

2025 yilning yanvar-iyul oylarida Qozog‘iston aholisi 124,5 ming nafarga yoki 0,61 foizga ko‘paydi. Natijada 1 avgust holatiga ko‘ra, aholining umumiy soni 20 million 407,8 ming kishiga yetdi. Bu haqda Qozog‘iston Milliy statistika qo‘mitasi xabar berdi. 

Qayd etilishicha, bu yilgi aholi sonining o‘sish sur’ati avvalgi yillarga nisbatan ancha sekinlashgan. Shu bilan birga, mamlakatning yarmidan ko‘p hududlarida yuqori darajadagi migratsiya sababli aholi kamayishda davom etmoqda.

Respublika bo‘yicha o‘sish o‘rtacha ko‘rsatkichdan yuqori bo‘lgan besh hudud qayd etilgan: Ostona (3,92 foiz), Chimkent (1,99 foiz), Olmaota (1,46 foiz), Olmaota viloyati (1,34 foiz) va Mang‘istau viloyati (1,11 foiz). Yana to‘rtta viloyatda o‘sish bo‘lsa-da, u o‘rtacha ko‘rsatkichdan past bo‘lgan. Bu Aqtobe, Atirau, Oqmola va Qizilo‘rda viloyatlari sanaladi. 

Qolgan barcha viloyatlarda aholining kamayishi kuzatilgan. Eng yuqori kamayish Shimoliy Qozog‘iston, Abay va Ulitau viloyatida qayd etilgan. Shimoliy Qozog‘iston va Sharqiy Qozog‘iston viloyatlarida esa tabiiy kamayish kuzatilib, o‘lim darajasi tug‘ilishdan oshib ketgan. Qolgan hududlarda tabiiy o‘sish saqlanib qolgan.

Migratsion o‘sish faqat beshta hududda – uchta yirik shahar (Ostona, Olmaota, Chimkent) hamda Olmaota va Mang‘istau viloyatlarida ijobiy bo‘lgan. Boshqa hududlarda esa, aksincha, ketayotganlar soni kelayotganlardan ko‘p.

Shahar aholisi yanvar-iyul oylarida 1,2 foizga ko‘payib, 12 million 926 ming kishiga yetgan. Qishloq aholisi esa 0,38 foizga kamayib, 7 million 482 ming kishini tashkil etgan. Shu tariqa, Qozog‘iston aholisi tarkibida shaharliklar ulushi 63,3 foizni, qishloqliklar esa 36,7 foizni tashkil qilmoqda.

Eslatib o‘tamiz, 2025 yilning 1 iyul holatiga ko‘ra, Tojikiston aholisi 10,6 million kishidan oshgandi. Yanvar–iyun oylarida 116,2 ming yangi tug‘ilgan chaqaloq va 17,2 ming nafar vafot etgan fuqaro qayd etilgan. Ularning orasida bir yoshga to‘lmagan 800 bola ham bor.