Қобул Дўсов манзил-колонияда жазо ўташи маълум қилинди

Аввалроқ, кеча, 24 январь куни Ўзбекистон Республикаси Ички ишлар вазирлиги собиқ депутат Қобул Дўсовни Самарқанд вилоятида ҳибсга олгани хабар қилинганди. Олий суд матбуот котиби Азиз Обидов мазкур ҳолатга изоҳ берди ва Дўсов нима сабабдан қамоққа олинганини тушунтирди.

Жиноят ишлари бўйича Чилонзор туман судининг 2024 йил 22 ноябрдаги ҳукмига мувофиқ Қобул Дўсов (1984 йилда Самарқанд вилоятида туғилган) Жиноят кодексининг 140-моддаси (ҳақорат қилиш) 3-қисми “а” бандида назарда тутилган жиноятни содир этганликда айбли деб топилиб, унга 1 йил муддатга озодликни чеклаш жазоси тайинланган эди. Суд ҳукмига кўра, Жиноят кодексининг 481-моддасига (озодликни чеклаш) асосан Дўсовга сутканинг муайян вақти, яъни кеч соат 21:00 дан эрталабки соат 07:00 га қадар яшаш жойидан чиқиш чекланиши ва унга қўшимча интернетдан фойдаланмаслик, оммавий ва бошқа тадбирлар ўтказишда иштирок этмаслик, ҳар ойда бир маротаба яшаш жойи бўйича ИИО ФМБ Пробация бўлимидан рўйхатдан ўтиб туриш ҳамда маҳкумларни назорат қилувчи органнинг розилигисиз яшаш жойини ўзгартирмаслик каби тақиқлар юкланиши белгиланган.

"Яшнобод туман ИИО ФМБ Пробация бўлими томонидан судга киритилган тақдимномада Қобул Дўсов ахлоқан тузалиш йўлига ўтмаганлиги, унинг чеклов ва тақиқларга риоя этмасдан жазони ўташдан қасддан бўйин товлаб келаётганлиги, бир неча маротаба у билан олиб борилган профилактик суҳбатлардан ўзига ижобий хулоса чиқармаётганлиги ҳамда уни жамиятдан ажратмаган ҳолда тарбиялаш имконияти йўқлигини инобатга олиб ҳамда суд ҳукми ижросиз қолаётганлиги сабабли Жиноят кодексининг 481-моддаси 6-банди ва Жиноят-ижроия кодексининг 444-моддаси (озодликни чеклаш тариқасидаги жазони ўташ тартиби ва шартларини бузганлик учун жавобгарлик) 3-қисми “а” бандига асосан Қобул Дўсовнинг ўталмай қолган 11 ой 2 кун озодликдан чеклаш жазосини шу муддатга озодликдан маҳрум қилиш жазосига алмаштириш сўралган", дейилади хабарда.

Маълум қилинишича, иш ҳужжатларига кўра, Қобул Дўсовга нисбатан чиқарилган суд ҳукми рўйхатга олиниб, ижрога қаратилиб, унга жазо ўташ қонун-қоидалари билан таништирилган ва Жиноят кодексининг 481-моддаси 6-қисми билан огоҳлантирилиб, бу ҳақида тилхатлар олинган.

"Суд ҳукмида Қобул Дўсовга белгиланган чеклов ва тақиқларга риоя этмаган тақдирда Жиноят кодексининг 48-1-моддаси 5- ва 6-қисми талаблари тушунтирилган бўлишига, шунингдек, унга интернетдан фойдаланмаслик қўшимча тақиқ юклатилган бўлишига қарамасдан 2025 йил 4 январь кунидан 11 январь кунига қадар унинг номига очилган Telegram-каналига ҳар хил мазмундаги материаллар жойлаштириб келганлиги аниқланган. Ушбу ҳолат юзасидан Қобул Дўсов Яшнобод тумани ИИО ФМБ Пробация бўлимига чақиртирилиб, унга Жиноят-ижроия кодекснинг 44-4-моддаси 1-қисмига асосан 2025 йил 11 январь куни огоҳлантириш тарзидаги интизомий жазоси қўлланилган", дейилади хабарда.

Билдирилишича, жорий йилнинг 24 январь куни ИИВ ТҚД Киберхавфсизлик томонидан Қобул Дўсовга огоҳлантириш интизомий жазоси эълон қилинган вақтида ҳам, ундан кейинги кунларда ҳам интернетдан фаол фойдаланиб келганлиги аниқланган. Суд тақдимномани муҳокама қилиб ҳамда иш ҳужжатларини текшириб, тақдимномани қаноатлантиришни лозим топган.

"Жиноят кодексининг 481-моддаси 6-қисмига асосан агар шахс озодликни чеклаш тариқасидаги жазони ўташдан қасддан бўйин товлаган, шунингдек, суд томонидан ўз зиммасига юкланган мажбуриятларни бажармаган тақдирда, суд озодликни чеклаш жазосининг ўталмай қолган муддатини бошқа турдаги жазо билан алмаштириши мумкин", дейилади хабарда.

Шу тариқа жиноят ишлари бўйича Яшнобод туман судининг жорий йилнинг 24 январдаги ажримига мувофиқ Яшнобод тумани ИИО ФМБ пробация бўлимининг тақдимномаси қаноатлантирилиб, жиноят ишлари бўйича Чилонзор туман судининг 2024 йил 22 ноябрдаги ҳукми билан маҳкум Қобул Дўсовга нисбатан тайинланган ва ўталмай қолган 11 ой 2 кун озодликни чеклаш жазоси шу муддатга озодликдан маҳрум қилиш жазосига алмаштирилган. Жазони манзил-колонияларда ўташ белгиланган.

Эслатиб ўтамиз, ўтган йилнинг 22 ноябрь куни жиноят ишлари бўйича Чилонзор туман судида собиқ депутат Қобул Дўсовга оид жиноят ишини кўриб чиқиш бўйича очиқ суд жараёни якунланиб, суд ҳукми эълон қилинганди. Суд ҳукмига мувофиқ Дўсов жабрланувчи (Мактабгача ва мактаб таълими вазири ўринбосари) Фарҳод Боқиевга нисбатан Жиноят кодексининг 140-моддаси (ҳақорат қилиш) 3-қисми "а" бандида назарда тутилган жиноятни содир этганликда айбли деб топилиб, унга 1 йил муддатга озодликни чеклаш жазоси тайинланганди.