“Қиёмат бўлгандек”. Жабалия қочқинлар лагерига берилган авиазарба оқибатлари (фоторепортаж)

Исроилнинг Ғазо шимолидаги аҳоли зич жойлашган Жабалия қочқинлар лагерига уюштирган зарбаси ҳалокатли вайронагарчиликларга сабаб бўлди ва кўп сонли одам ҳалок бўлди.

Омон қолганлар ва гувоҳлар CNN телеканалига воқеа ҳақида гапириб берган.

“Мен нон сотиб олиш учун навбатда тургандим, тўсатдан ва ҳеч қандай огоҳлантиришсиз етти-саккизта ракета қулаб тушди. Ерда етти-саккизта улкан тешик бор эди, улар ўлдирилган одамлар билан тўла, ҳамма жойда тана қисмлари сочилиб ётарди. Қиёмат юз бергандек туюлди”, дейди воқеа гувоҳи Муҳаммад Иброҳим.

Исроил мудофаа кучлари томонидан берилган баёнотга кўра, ҳаво ҳужумида 1400 дан ортиқ одам ҳалок бўлган ва юзлаб одамлар гаровга олинган. Шунингдек, ҲАМАС қўмондонларидан бири сифатида тасвирланган Иброҳим Биари ўлдирилгани айтилмоқда.

Бироқ ҲАМАС қочқинлар лагерида етакчиларидан бири борлигини қатъиян рад этган. ҲАМАС  матбуот котиби Ҳазем Қосим Исроилни Жабалия лагеридаги ушбу фожиани оқлашга уринаётганликда айблаган. 

Воқеага гувоҳ Муҳаммад Ал Асвад зарбадан сўнг юз берган даҳшатли манзарани тасвирлаб, CNN телеканалига ракеталар тушганини эшитиб, оиласини текшириш учун қочқинлар лагерига югурганини билдирган.

“Чанг ичида болалар бошқа яраланган болаларни кўтариб югуришди. Жасадлар вайроналарда осилиб турарди, уларнинг аксариятини таниб бўлмасди”, дейди Ал Асвад.

"Ҳеч ким тасаввур қила олмайдиган манзара"

Жабалияга энг яқин йирик тиббиёт муассасаси бўлган Индонезия шифохонасида акс этган видеоларда полда ётган жасадларнинг узун қатори, шунингдек, кўп сонли ярадорлар, жумладан, болалар, шифокорлар жароҳатларини даволаш учун шошилишаётганини кўриш мумкин. 

"Сиз кўраётган нарса ҳеч ким тасаввур қила олмайдиган манзара: яраланган шаҳидлар, юзлаб куйган жасадлар. Биз қила оладиган нарса – уларни қабул қилишда давом этиш. Жароҳатларнинг аксарияти портлаш оқибатлари – бош жароҳатлари ва ампутациялардир", дейди шифокор Муҳаммад ал Ранн. 

Жабалия Ғазодаги энг катта қочқинлар лагери бўлиб, 1,4 квадрат километрга тарқалган. Бу шунингдек, анклавдаги энг қашшоқ ҳудудлардан бири. Фаластин Ташқи ишлар вазирлиги зарбани қирғин деб таърифлаган.