Қирғизистон Президенти Озодбек Назарбековни тақдирлади

Бугун, 13 декабрь куни Қирғизистон Президенти Садир Жапаров Ўзбекистон Маданият вазири Озодбек Назарбековни “Қирғизистон Республикаси халқ артисти” фахрий унвони билан тақдирлади. Бу ҳақда Ўзбекистон Маданият вазирлиги хабар берди. 

“Халқларимизни кўп асрлик дўстлик ва яхши қўшничилик ришталари бирлаштириб туради. 1992 йилда дипломатик муносабатлар ўрнатилганидан буён икки томонлама алоқалар янги босқичга кўтарилди ва бу ҳамкорликни мустаҳкамлашда маданият муҳим ўрин тутади”, деган Жапаров.

Шунингдек, Садир Жапаров 2025 йилда Қирғизистонда бўлиб ўтадиган Ўзбекистон маданияти кунлари икки халқнинг янада яқинлашишида муҳим воқеа бўлишига ишонч билдирган.

Қирғизистон Президенти Озодбек Назарбековни “Қирғизистон Республикаси халқ артисти” унвони билан тақдирлангани билан табриклаб, унинг мамлакатлар ўртасидаги маданий алоқаларни ривожлантириш ва дўстликни мустаҳкамлашга қўшган улкан ҳиссасини таъкидлаган.

 “Ижодий йўлингиз кўпчиликни илҳомлантиради. 15 декабрь куни Тўқтўғул Сатилганов номидаги Қирғизистон миллий филармониясида бўлиб ўтадиган сизлар иштирокингиздаги мусиқий кеча умумий маданий ҳамжиҳатлигимизнинг яна бир ёрқин намунаси бўлади”, деган Қирғизистон раҳбари.

Маълумот учун, жорий йилнинг апрель ойида Озодбек Назарбеков Тожикистон халқ ҳофизи фахрий унвони билан тақдирланган. 2020 йилда эса ўша пайтдаги Туркманистон президенти Гурбангули Бердимуҳамедов Назарбековни Туркманистонда хизмат кўрсатган артист унвони билан тақдирлаган. Шунингдек, Озодбек Назарбеков Қозоғистон ва Ўзбекистон ўртасидаги маданий алоқаларни янада ривожлантиришга қўшган ҳиссаси учун Қозоғистон Республикасининг иккинчи даражали “Достиқ” (“Дўстлик”) ордени билан тақдирланган. Мукофотни Қозоғистон Президенти Қосим-Жомарт Тўқаев номидан ушбу мамлакатнинг Ўзбекистондаги фавқулодда ва мухтор элчиси Бейбут Атамқулов топширган.