Қатар-2022. Россия ва Польша учрашуви ёзга қолдирилмоқда

Халқаро футбол федерацияси (FIFA) Россия ва Польша терма жамоалари ўртасидаги Қатарда бўлиб ўтадиган жаҳон чемпионатига саралаш ўйинини июнь ойига кўчириш ғоясини кўриб чиқмоқда. Бу ҳақда Польшанинг “Interia” портали хабар берди.

Манбага кўра, Польша футбол иттифоқи (PZPN) эртага, 8 март куни эълон қилинадиган FIFA’нинг якуний жавобини кутмоқда.

Жорий йилнинг 28 февраль куни Европа футбол ассоциациялари иттифоқи (UEFA) ва FIFА Россиянинг Украинага қилган босқини туфайли Россия клублари ва жамоаларини халқаро мусобақаларда иштирок этишни тўхтатди. FIFA томонидан қабул қилинган санкциялар муносабати билан футбол бўйича Россия терма жамоаси 2022 йилда Қатарда бўлиб ўтадиган жаҳон чемпионатига чиқиш ҳуқуқи учун март ойида бўлиб ўтадиган плей-офф босқичида иштирок этолмайдиган бўлди.

Маълумот ўрнида, Россия терма жамоаси саралашнинг ярим финал учрашувида 24 март куни Польша терма жамоасига қарши майдонга тушиши керак эди. Саралашнинг қоидасига биноан ушбу учрашув ғолиби 29 март куни Швеция – Чехия баҳси ғолибига қарши майдонга тушиши лозим бўларди.

Россия спортига киритилган чекловлар 

Рус қўшинлари Украинага киргач, Халқаро дзюдо федерацияси (ХДФ) Россия Президенти Владимир Путинни ташкилот фахрий президенти ва элчиси мақомидан маҳрум қилди. 

Польша, Чехия ва Швеция футбол терма жамоаси Жаҳон чемпионатига саралаш доирасида Россия билан ўйинга боришдан бош тортди.

Европа футбол уюшмалари иттифоқи (UEFA) 2022 йилги Европа Чемпионлар лигаси финали Санкт-Петербург шаҳридан Парижга кўчирилганини маълум қилди.

FIFA  ҳамда UEFA Россия терма жамоалари ва клубларини барча футбол мусобақаларидан чиқариб ташлади.

Халқаро баскетбол федерацияси россиялик баскетболчилар ва расмий шахсларни ташкилот шафелигидаги барча мусобақаларда иштирок этишдан четлаштирди.

Дунёдаги энг йирик спорт кийимлари компанияси “Аdidas” Россия футбол жамоалари билан ҳамкорликни тўхтатганини маълум қилди. Шунингдек, Германиянинг "Шальке 04" клуби ва UEFA'нинг ўзи ҳам Россиянинг "Газпром" трансмиллий компанияси билан ҳамкорликни тўхтатди.

Халқаро Паралимпия қўмитаси (IPC) россиялик ва беларуслик атлетларни Пекин-2022 Паралимпия ўйинларидан четлатди.

Шунингдек, 2023 йилда Россиянинг Қозон шаҳрида бўлиб ўтадиган Махсус Олимпиада ўйинлари бекор қилинди.