Қабрдаги Жириновскийнинг суди давом этади (видео)

Украинанинг Шевченковский туман суди Россия Либерал-демократик партиясининг асосчиси, марҳум Владимир Жириновскийнинг иши бўйича навбатдаги суд мажлисини тайинлади. Бу ҳақда РБК хабар берди.

Жириновскийга нисбатан иш 2018 йилда Украина Жиноят кодексининг 258-5-моддаси 3-қисми (терроризмни уюшган гуруҳ томонидан ёки ўта йирик миқёсда молиялаштириш) бўйича очилган.

Гумонланувчилар орасида Россия Спорт вазири Михаил Дегтярёв ва Давлат думасининг Федерал тузилма ва маҳаллий бошқарув масалалари қўмитаси раиси Алексей Диденко ҳам бор.

Суддан олдинги тергов давомида Жириновский 2018 йилнинг март-апрель ойларида ўзини ўзи эълон қилган Донецк ва Луганск халқ республикалари учун маблағ йиғиш билан шуғулланган гуруҳ ташкил этгани аниқланган. Бош прокуратура маълумотларига кўра, 2014 йилнинг март-июнь ойларида ўзини ўзи эълон қилган Донбасс республикалари учун Давлат думасининг яна икки депутати ҳам маблағ йиғиш билан шуғулланган. Бундан ташқари, тергов маълумотларига кўра, Жириновский бошчилигидаги гуруҳ ДХР вакилларига олтита автомашинани Москвадаги сўровига кўра ДХР вакилларига олиб боришга ёрдам берган.

2023 йилнинг ноябрида суд Жириновскийнинг адвокати Артём Галкиндан мижозининг ўлими туфайли жиноий ишни тугатиш тўғрисида илтимоснома олган. Суд мажлиси 2024 йилнинг январига белгиланган эди.

Бундан ташқари, қарорда марҳумнинг яқин қариндошлари уни реабилитация қилиш тўғрисида ариза бериш ҳуқуқига эга экани қайд этилган.

Жириновский Украинада ўзига нисбатан қўзғатилган жиноят ишини “сиёсий таъқибга уриниш” деб атади. Унинг сўзларига кўра, таъқиблар партия фаоллари “Украинадаги русларга қўлдан келганча ёрдам бергани” билан боғлиқ.

Эслатиб ўтамиз, аввалроқ Россия Либерал-демократик партиясининг асосчиси Владимир Жириновскийнинг хорижга чиқиш паспорти Санкт-Петербургдаги кимошди савдосида 1,1 млн рублга (тахминан 13 минг доллар) сотилганди. Бир неча рус нашрлари Жириновскийнинг 2008 йил март ойида президентлик сайловларидан кейин журналистларга берган интервьюсида айтган гапларини эсга олиб, “у қайтди” дея эслаган. Ўшанда Жириновский “ҳатто қабристондан ҳам сизларга сигнал бераман” деган эди.