Италиялик спортчи бир ойлик комадан кейин вафот этди

Италиялик велосипедчи Кевин Боналдо 25 ёшида ҳаётдан кўз юмди. Спортчи “Кичик Сан-Ремо” (Piccola Sanremo) деб номланувчи пойга вақтида юрак хуружига учраб, бир ой давомидаги комадан сўнг вафот этди. Бу ҳақда “Domestique” нашри хабар берди.

Кеча, 24 октябрь куни “Сc Padovani Polo Cherry Bank” жамоаси Боналдонинг вафот этганини тасдиқлади.

“Ҳаёт ва ўлим ўртасидаги бир ойлик курашдан сўнг Кевин Боналдо вафот этди. Клубимиз Кевиннинг оила аъзолари ва яқинларига чуқур ҳамдардлик билдиради”, дейилади клуб расмий баёнотида.

Фожиа жорий йилнинг 21 сентябрь куни “Кичик Сан-Ремо” пойгаси чоғида юз берган. Боналдо мусобақа пайтида юрак хуружига учрагач, унга зудлик билан тиббий ёрдам кўрсатилган ва Виченцадаги Сан-Бортоло шифохонасининг реанимация бўлимига ётқизилган эди.

Сўнгги ҳафталарда спортчининг аҳволи бироз яхшилангани айтилган бўлса-да, сўнгги кунларда ҳолати бирдан оғирлашиш оқибатида спортчи вафот этган.

“Бу мавсумда биз Кевинни ҳар бир пойгага ўзимиз билан олиб бордик. 21 сентябрда бошланган мусобақа афсуски, фожиали хабар билан якунланди. Биз унинг оила аъзоларига чуқур ҳамдардлик билдирамиз”,  дейди жамоа президенти Галдино Перуззо.

Маълумот учун, Боналдо сўнгги беш йил ичида Италия велоспортида ҳурматга сазовор спортчига айланди. У асосан миллий мусобақаларда муваффақиятли иштирок этиб, барқарор натижалар қайд этган. Жорий мавсумда 25 ёшли спортчи ўзининг пойга дастурини кенгайтириб, сўнгги UCI 2.2 тоифасидаги пойгаларда илк ўнталикдан жой олган эди.