Исроил Ғазога кунига 500 тагача инсонпарварлик карвонини киритишга ваъда берди

Кеча, 11 апрель куни Исроил Ғазога кунига 500 тагача ёрдам машинасини ўтказишга ваъда берди. Бу ҳақда мамлакат Мудофаа вазири Йоав Галант маълум қилди.

Вазир шу турдаги жами бешта ташаббусни эълон қилган.

“Биз Ғазони ёрдам билан таъминлашни режалаштирмоқдамиз ва тез орада кунига 500 юк машинаси етиб боради. Шунингдек, биз хавфсизлик текширувларини ва халқаро иттифоқчилар билан ҳамкорликни кучайтирамиз”, деган Йоав.

Вазирга кўра, ўтган ойда Ғазога ўртача 213 та юк машинаси жўнатилган бўлса, бундан олдин бу кўрсаткич 170 тани ташкил этган эди. Ўтган сешанба кунининг ўзида эса анклавга 467 юк машинаси етказилган, яна 303 контейнер гуманитар ёрдам самолёт орқали жўнатилган.

У бошқа қадамлар қаторида Ашдод порти орқали Ғазога гуманитар ёрдам етказилишининг бошланиши ва шимолда янги назорат-ўтказиш пунктининг очилишини тилга олган. Бундан ташқари, вазир Иордания орқали ўтадиган икки йўналиш бўйича гуманитар юк ташиш ҳажмини оширишга ва қироллик Ҳарбий-ҳаво кучлари билан бу соҳада ҳамкорликни йўлга қўйишга ваъда берган.

Эслатиб ўтамиз, 4 апрель куни АҚШ Президенти Жо Байден Исроил Бош вазири Биньямин Нетаньяху билан телефон орқали мулоқоти чоғида уни Ғазо секторидаги гуманитар хизматчилар ва тинч аҳолини ҳимоя қилиш учун тезкор чоралар кўришга чақирган эди. Президентнинг айтишича, Исроилнинг Ғазо секторидаги ҳарбий амалиёти АҚШ томонидан кейинчалик ҳам қўллаб-қувватланиши ана шу чораларга боғлиқ бўлади. Орадан бир кун ўтиб, 5 апрель куни, Байденнинг таҳдидидан сўнг Исроил Ғазога кўпроқ гуманитар ёрдам киришига рози бўлди.