Исроил АҚШ ёрдамига муҳтож эмас – Нетаньяху

Исроил Бош вазири Бинямин Нетаньяху мамлакат АҚШнинг молиявий ёрдамига энди муҳтож эмаслигини билдириб, кўмакдан воз кечиш жараёнини жорий йилнинг ўзидаёқ бошлашни исташини маълум қилди. Бу ҳақда у жорий йилнинг 30 июнь куни “Channel 14”га берган интервьюсида сўз очди.

Нетаньяхунинг айтишича, Исроил иқтисодиёти мустақил равишда ўзини таъминлай оладиган даражага етган.

“Мен АҚШ ёрдамини тўхтатишни истайман. Бу ижтимоий нафақага ўхшайди, мен буни хоҳламайман”, деган у.

Бош вазирнинг айтишича, АҚШдан олинаётган маблағ Исроил ялпи ички маҳсулотининг жуда кичик қисмини ташкил этади ва мамлакат уни ўз маблағлари ҳисобидан қоплай олади.

“Бизнинг иқтисодиётимиз энди кичик иқтисодиёт эмас. АҚШдан олаётган ялпи ички маҳсулотимизнинг шу кичик қисмини ўзимиз молиялаштира оламиз. Мен бу жараён жорий йилнинг ўзидаёқ бошланишини истайман”, деган Нетаньяху.

Шунингдек, у ҳукуматининг хавфсизлик ва ташқи сиёсатдаги позициясига ҳам тўхталиб, Фаластин давлати ташкил этилишига қарши эканини яна бир бор такрорлаган.

“Исроил яҳудий халқининг миллий давлатидир. Бу ерда ҳеч қандай Фаластин давлати ташкил этилмайди”, деган у.

Нетаньяхунинг айтишича, Исроил панжаралар ортида туриб таҳдидларни кутиб ўтирмайди ва фаол хавфсизлик сиёсатини давом эттиради.

Эслатиб ўтамиз, аввалроқ АҚШ ва Эрон ўртасида эришилган келишувнинг энг катта “қурбони” Исроилнинг Эронга нисбатан стратегияси эмас, балки мамлакат Бош вазири Бинямин Нетаньяхунинг сиёсий имижи бўлиши мумкинлиги ҳақида хабар берилган эди.