Испанияда блэкаут оқибатида 5 киши ҳалок бўлди

Испанияда 28 апрель куни содир бўлган йирик электр таъминоти узилиши (блэкаут) оқибатида камида 5 киши ҳалок бўлди. Бу ҳақда “El País” нашри хабар берди.

Нашрнинг ёзишича, кеча, 29 апрель куни эрталаб Оренсе шаҳрида эр-хотин ва уларнинг ўғлининг жасади топилган. Гвардия ходимлари ҳодисани ўрганмоқда. Дастлабки тахминларга кўра, улар ис газидан заҳарланган бўлиши мумкин. Сабаби, электр узилиши вақтида ишлатилган генератор носоз бўлган. Нашрга кўра, блэкаут пайтида ўн нафарга яқин одам ис газидан заҳарланиб, ёнғин хавфсизлиги хизмати томонидан қутқарилган.

Валенсияда эса кислород аппаратига уланган 46 ёшли аёл электр ўчиши сабабли вафот этган. Шифокорлар етиб келгунча, полиция ходимлари юрак-мияни сунъий нафас олдириш усули билан ҳаётини сақлаб қолишга ҳаракат қилган, бироқ у муваффақиятсиз якунланган.

Яна бир аёл Карабанчель шаҳрида ҳаётдан кўз юмган. Унинг уйида электр йўқлиги сабабли ёқилган шамдан ёнғин чиқиб кетган, деган тахмин мавжуд.

Эслатиб ўтамиз, 28 апрель куни Испаниянинг катта қисми, шунингдек Португалия, Андорра ва Франциянинг айрим ҳудудлари электрсиз қолган эди. Электр узилишининг аниқ сабаблари ҳали аниқланмаган, бироқ бунга ноёб атмосфера ҳодисаси сабаб бўлгани айтилмоқда. 29 апрель тонгида Испанияда электр таъминоти 99,16 фоиз хонадонларда тикланган.