Испания қироли Мессини кечки овқатга таклиф қилди

Саккиз карра “Олтин тўп” соҳиби, аргентиналик футболчи Лионель Месси Испания қироли Фелипе VI ва қиролича Летисия билан расмий кечки овқатга таклиф этилди. Бу ҳақда “Marca” нашри хабар берди.

Манбага кўра, Месси бугун, 22 октябрь куни Испаниянинг Овьедо шаҳрига спорт йўналишидаги Астурия маликаси номидаги мукофотини қабул қилиб олиш учун боради. Шунингдек, у Овьедо спорт саройида мактаб ўқувчилари, талабалар ва мухлислар билан учрашувда иштирок этади.

Шу куни кечқурун “Интер Майами” ҳужумчиси Испания қироллик оиласи ва мукофот совриндорлари иштирокидаги расмий кечки овқатда қатнашиши кутилмоқда. Тадбирда Мессидан ташқари, бошқа мукофот соҳиблари ҳам иштирок этади.

Астурия маликаси номидаги мукофотни топшириш маросими эртага, 23 октябрь куни Кампоамор театрида бўлиб ўтади. Маросимдан сўнг Месси АҚШга йўл олади. У ерда футболчи MLS доирасида жорий йилнинг 25 октябрь куни “Нью-Йорк Ред Буллз”га қарши сафар учрашувида иштирок этади.

Эслатиб ўтамиз, аввалроқ Перуда аниқланган ва йўқолиб кетиш хавфи остида бўлган янги ўсимлик турига аргентиналик футболчи Лионель Месси шарафига Salvia messii – “Месси ўсимлиги” деб ном берилганди.