Ироқда мотам эълон қилинди

Бугун, 17 июль куни Ироқнинг Эль-Кут шаҳридаги “Hypermarket” савдо марказида кучли ёнғин юз бергани оқибатида 63 киши ҳалок бўлди ҳамда шаҳарда 3 кунлик мотам эълон қилинди. Бу ҳақда INA хабар берди.

Маълум қилинишича, 63 нафар ҳалок бўлганлардан ташқари 43 киши жароҳат олган ва уларнинг кўпчилигининг аҳволи оғир. 
Ироқ Бош вазири Муҳаммад ас-Суданий воқеа юзасидан зудлик билан чоралар кўришни буюрган. Ички ишлар вазирига ёнғин жойига бориб, ҳолатни ўрганиш, сабабларини аниқлаш ва айниқса, лоқайдлик ёки эҳтиётсизлик бўйича аниқ ва қатъий чоралар кўриш топширилган. Шунингдек, жабрланганларга тиббий ёрдам кўрсатиш учун тўлиқ жиҳозланган тиббий гуруҳ юборилган.

Ички ишлар вазири Абдул Амир Аш-Шаммари эса воқеани келтириб чиқарган аниқ сабабларга ойдинлик киритиш учун махсус комиссия тузган ва бу ишда ҳеч кимга нисбатан айбловдан қочилмаслиги қатъий таъкидланган.

Эслатиб ўтамиз, аввалроқ Хитойнинг Ляонин провинциясида жойлашган Ляоян шаҳридаги ресторанлардан бирида ёнғин содир бўлганди. Воқеа оқибатида 22 киши ҳалок бўлган ва уч киши жароҳатланган.