Ироқда 600 дан ортиқ зиёратчи хлордан заҳарланди (видео)

Кеча, 10 август куни Ироқда 621 нафар зиёратчи хлордан заҳарланиши оқибатида шифохонага ётқизилди. Ҳодиса мамлакатнинг марказий ва жанубий қисмида жойлашган Нажаф ва Карбало шаҳарлари ўртасидаги йўлда юз берган. Бу ҳақда Ироқ Соғлиқни сақлаш вазирлигига таяниб, “Al Jazeera” хабар беради.

Маълумотларга кўра, 621 нафар одам нафас олиш муаммолари билан рўйхатга олинган. Уларнинг барчасига зарур тиббий ёрдам кўрсатилган ва яхши аҳволда шифохонадан чиқарилган. Зиёратчилар хавфсизлигини таъминлашга масъул хавфсизлик кучлари воқеа сабаби сифатида Карбало-Нажаф йўлида жойлашган сув таъминоти станциясидан хлор сизиб чиқишини кўрсатган.

“Уларнинг барчасига зарур тиббий ёрдам кўрсатилди ва соғлом ҳолда шифохонани тарк этишди”, дейилади хабарда.

“Al Jazeera”нинг ёзишича, Ироқ инфратузилмасининг катта қисми ўнлаб йиллар давом этган урушлар, ички можаролар ва коррупция сабаб ачинарли аҳволда бўлиб, хавфсизлик қоидаларига риоя этиш кўпинча таъминланмайди. Хусусан,  жорий йилнинг июль ойида мамлакат шарқидаги Кут шаҳридаги савдо марказида катта ёнғин юз бериб, 60 дан ортиқ одам ҳалок бўлган. Расмий маълумотларига кўра, уларнинг кўпчилиги ҳожатхоналарда бўғилиб қолган.

Маълумот ўрнида, Ироқнинг Карбало шаҳрига ҳар йили миллионлаб шиа мусулмонлари Имом Ҳусайн ва унинг укаси Аббос мақбараларини зиёрат қилиш учун боради. Шунингдек, ушбу шаҳарда улар Муҳаммад (с.а.в.) пайғамбарнинг набираси Ҳусайннинг ўлимини хотирлаб, 40 кунлик мотам тутади.

Эслатиб ўтамиз, аввалроқ Доғистоннинг Магарамкент туманида уч кун ичида 302 киши, жумладан, 294 бола сувдан заҳарланиб, марказий туман шифохонасига ичак инфекцияси белгилари билан мурожаат қилганди.