iPhone 18 Pro қандай рангда бўлиши айтилди

Apple компаниясининг iPhone 18 Pro туркумидаги смартфонлари классик қора рангда чиқарилмайди. Бу ҳақда инсайдер “Instant Digital”га таяниб, “MacRumors” хабар берди. 

Маълумотларга кўра, компания ўзининг кейинги авлод премиум моделлари учун қора рангдан воз кечмоқда. iPhone 17 Pro ва iPhone 17 Pro Max бренд тарихида қора ёки тўқ кулранг вариантлардан маҳрум бўлган илк флагманлар бўлганди. Ҳозирда улар фақат кумушранг (Silver), тўқ сариқ ранг (Cosmic Orange) ва тўқ кўк (Deep Blue) рангларда ишлаб чиқарилмоқда.

“Bloomberg” журналисти Марк Гурманнинг хабар беришича, ҳозирда Apple iPhone 18 Pro учун бир нечта анъанавий вариантлар билан бирга тўқ қизил корпус рангини синовдан ўтказмоқда.

Бунгача инсайдерлар бинафша ва жигарранг версиялар ҳақида гапирган, бироқ Марк Гурманнинг фикрича, буларнинг барчаси шунчаки синовдан ўтказилаётган қизил концепциянинг кўринишларидир.

Шу билан бирга, компания, аксинча, ўзининг бўлажак буклама iPhone модели учун классик ранглар палитрасидан фойдаланишни режалаштирмоқда. Ишлаб чиқарувчи ёрқин ранглардан воз кечиб, консерватив вариантлар: кулранг (space gray) ёки қора, шунингдек, кумушранг ёки оқ рангларга устунлик бериши кутилмоқда.

iPhone 18 Pro линиясининг расмий тақдимоти сентябрь ойида бўлиб ўтиши керак, буклама смартфон эса бозорда ўша йилнинг бироз кейинроқ муддатларида пайдо бўлиши мумкин.