Интригасиз соврин эгасини топди
Спорт
−
31 Октябрь 2023
9908Аргентиналик тўп устаси Лионель Месси 2022/2023 йилги мавсум якунлари бўйича “France football” нашри томонидан топшириладиган йилнинг энг яхши футболчиси учун соврин – “Олтин тўп”ни қабул қилиб олди.
Франция пойтахти Париждаги “Шатле” театрида бўлиб ўтган маросимда Месси норвегиялик Эрлинг Холанд ва франциялик Киллиан Мбаппени ортда қолдириб, фаолиятидаги 8-“Олтин тўп”га эга чиқди. Мессининг мазкур совринни қўлга киритишида унинг ўтган йили Аргентина билан Қатарда бўлиб ўтган Жаҳон чемпионатида ғолиб бўлгани бош омил бўлди.
Маълумот учун, “Интер Майами” аъзоси фаолиятидаги 1-“Олтин тўп”га 2009 йили “Барселона” сафида эга чиққан. Шунингдек, Лео 2010,2011,2012,2015,2019 ва 2021 йилларда йилнинг энг яхши футболчиси сифатида эътироф этилган.